भांगरभूंय | प्रतिनिधी
राज्य सरकाराचे अॅप्रेंटिसशीप येवजणेक तेंको मेळपाक लागला ही खोशयेची गजाल. ह्याच होमखण स्तंभांतल्यान अॅप्रेंटीस
येवजणे विशीं बरयिल्लें तेन्ना तसो अदमास उक्तायिल्लो. लेखाक प्रतिसाद मेळ्ळोच, पूण मुख्यमंत्री डॉ. प्रमोद सावंत आनी सरकाराच्या हेर यंत्रणां वरवीं येवजणेची चडांत चड म्हायती दिवपाचे यत्न जाले. प्रशिक्षणार्थी पासत नोंदणी केल्ल्यांक एकाच धपक्यांत प्रशिक्षण मेळटलें? प्रशिक्षणा खातीर जांकां घेतले तांचें शिक्षण, तांची आवड समजून घेवप समा जातलें. घेतिल्लें प्रशिक्षण आनी केल्ल्या अभ्यासाचो उपेग जालो तर ताचो लाव सरकाराकूच न्हय प्रशिक्षणा खातीर फुडें सरिल्ल्या उमेदवारांकूय फुडारांत मेळटलो. म्हायती उक्तेपणान दिल्ल्यान एखाद्रे येवजणेक उपाट प्रतिसाद मेळूंक शकता. वीस हजारां वयर ऑनलायन नोंदणी जावपाची शक्यताय न्हयकारूंक येना. नोंदणेंत चड उमेदवार आसल्यार उमेदवारांच्या सर्टिफिकेटांच्या तपासणे वांगडाच तांचे इंटरव्यू (ऑनलायन) वा परिक्षा घेतले? निमाणें प्रशिक्षण घेतिल्ल्यांक खासगी, सरकारी नोकरेंत थेट घेतले? मोलावणी वा परिक्षा जातली? ह्या प्रश्नांच्यो जापो मेळपाक जाय.
प्रशिक्षणार्थींची मोलावणी जाल्यार सरकाराक उंचेल्या तांकीची कुशळटाय आशिल्लें मनीसबळूय मेळपाक शकता. मेळिल्लें प्रशिक्षण, अणभवांतल्यान सरकाराचे मान्यतायेन उमेदवार उदरगत आनी प्रशिक्षण कार्यशाळाय सुरू करपाक शकतात. ही येवजण रोजगारांत स्वयंपूर्ण जावपाक आदार दिवपी आसची हे खातीर प्रशिक्षण दिवपी, अणभवी, उंचेल्या तांकीचे आसतले हाची जतनाय सरकारान घेवची. प्रशिक्षण ऑनलायन दिवपाची तजवीज जावची, निवृत्त, वरिश्ठ अधिकारी (खासगी, सरकारी) प्रशिक्षणांत आसल्यार प्रशिक्षणार्थींक उर्बा मेळटली.
प्रशिक्षण भोवकुशळटायेचें, तेंपा प्रमाणे कुरपणें घालपी भोवकुशळ मनीसबळ तयार करपी आसचें. फक्त फाटल्यान पळोवन आदलेंच झरोवन सांगपी न्हय जाल्यार आयज कितें घडलां? फाल्यां कितें घडटलें? ताचो अदमास सांगपाचें, वावुरपाचे प्रशिक्षण मेळपाक जाय. सकारात्मक नदर प्रशिक्षण दिवपी, प्रशिक्षण घेवप्यांक आसची, पंदरा दिसांतल्यान एकदां प्रशिक्षण घेवपी नवे पिळगे कडेन तांकां कितें समजलां ताची बारीकसाण घेवपाक जाय. सरकार प्रशिक्षणा खातीर पयसो खर्च करता, तातूंतल्यान नव्या बेकारांची निर्मणी जावची ना ताची काळजी घेवची.
सरकारी वळेरेंतले बेकारांत कसलोच कामधंदो नाशिल्ले आनी थोडे ल्हान व्हड तांकीचो वावरय करपी, पन्नास न्हय वीस पंचवीस हजार रुपया म्हयन्याक जोडपीय आसतले. बेकारांचें वळेरेंत खासगी नोकरेंत आशिल्ले पूण केन्ना तरी सरकाराचे सेवेंत वचपाक मेळटलें अशीं सपनां पळोवपी, प्रशिक्षणा पासत नोंदणी केल्ले आसतलेच.
गोंया सारकिल्ल्या ल्हान राज्यांत कवी बाकीबाब बोरकार हांचें ‘गोंयांत आसा अशें आसा कितें’ हे कवितेंतल्या ओळी प्रमाण फाटीर सॅक (साक न्हय बॅग) घेवन दिसपट्टे येवपी, दिसवाड्यार वावरांत आशिल्ले गोंया भायलेय आसात. एकदां गोंयांत आयले की तांकां परतून वचचें कित्याक दिसना? म्हारगाय गोंयांत देशांतल्या हेर राज्यां परस अती, हेर सुविधाय सोंपेपणान मेळनात अशी सदची पिंरगण लावपी गाडयांनी भोंवपीय आसात. गोंया भायल्यान येतल्यांक तशें दिसता व्हय? गोंयांत भायल्यान येवन दिसवड्यार कामांत बुडून पंदराच न्हय पंचवीस तीस वर्सां गोंयांतूच राबितो करपीय आसात. तांकां आतां भायले कशे म्हणप? पयलींचे मुखेलमंत्री, खासदारकी अर्दार सोडून आयिल्ल्या लुईझिन फालेरो हांचो पंदरा वर्सां राबित्याचो कायदो तांचे खातीर आयज देणें जालां. फटीचे, अडेचे राबित्याचे दाखले गोंयांत मेळपा खातीर नामो दिवपा पासत एकता नगरांच न्हय आतां सपनांतले बंगले, सुवात, कुडीय आसात. पंदरा वर्सां गोंयांत रावपी हेर राज्यांतले प्रशिक्षणांत आसतलेच, कोण आडावंक शकता तांकां? प्रशिक्षण पूर्ण जातकूच प्रशिक्षणार्थींक दुसऱ्या, तांच्या राज्यांतले नोकरेंत वचपाक मेळपाक जाय अशे तरेची मानसिकता घडोवपाक येता.
नोकऱ्यो गोंयांत आसात, गोंयकार उण्या पगाराचे नोकरेंत येवपा पसून फाटीं रावतात तें कित्याक? कोणे ही मानसिकता घडयल्या? गोंयकार येनात थंय राज्या भायलें मनीसबळ येता. सरकारान सोद घेतल्यार सत कळटलें. अॅप्रेंटिसशीप येवजणेचे म्हायतींतल्यान उण्या पगाराचे नोकरे कडेन फाट करतल्यांची मानसीकताय बदल्ल्या जाल्यार होलमतलें. पंदरा ते पंचवीस हजार रुपया मेळटात ती नोकरी आयज घेतल्यार दोन तीन वर्सांनी अणभवांतल्यान तीस पस्तीस हजारांचे नोकरेंत वचपाक मेळटा हें मुखेलमंत्र्यांनी संवादांतल्यान सांगचें.
अॅप्रेंटिसशीप येवजणेंतल्यान सरकार भोवकुशळ क्लार्क, ड्रायव्हर, प्यून, सेक्युरिटी, प्लंबर, मेस्त, जार्दीन फुलोवपी आनी तयार करपी, टेलर, कोयर वेवस्थापनांतले कर्मचारी, शिक्षक घडटलेच, अणभवांतल्यान, कुशळटायेंतल्यान, प्रशिक्षणांतल्यान तेवूय अधिकारी कित्याक जावचे न्हय? बडटेंतल्यान तशी संद सरकारी पांवड्यार, खासगी नोकरेंतय मेळटा अशें वातावरण गोंयांत आसा. कुशळटाय शिक्षणाची तजवीज नव्या शिक्षण धोरणांत आसा, अॅप्रेंटीसशीप येवजणेंतल्यान ते खातीर शिक्षकूय घडोवपाचो सरकाराचो विचार आसुये.
नव्या शिक्षण धोरणा बरोबर शिक्षणाच्यो वेगळ्यो वाटो तयार जातल्यो, गोंयांत नव्यो शिक्षण संस्थांय येवपाक सोदतात, कुशळटायेचें शिक्षण दिवपी विद्यापीठय येवपा खातीर आराखडो जाय. ह्या संस्थांतल्यान, विद्यापिठांतल्यान उंचेल्या तांकीचें, घसघशीत पगाराचें कुशळ मनीसबळ घडोवपी उच्च शिक्षण, देख मेळपाक जाय. मुळावेंच न्हय उच्च शिक्षणाची गंगा गोंयभर पावोवपाची मोख सरकारान दवरची, सरकारी मुळाव्यो शाळा रिकाम्यो पडल्यात, मालकी सरकाराची आसा थंय त्याच शाळांनी गरजे प्रमाण बदल करून उच्च शिक्षण म्हाविद्यालयां गांवगिऱ्या वाठारांनी पावोवपाक जाय. उंचेलें शिक्षण, प्रशिक्षण दितना तरणाट्यांची आवड आयज बदलता, उद्देगांतय तंत्रगिन्यान येता ताचो अभ्यास जावचो, पुस्तकांय जावचीं. उद्देगांक बराबर घेवन प्रशिक्षणार्थी घडल्यार तांकांय भायल्यान मनीसबळ हाडचें पडचें ना.
अॅप्रेंटिसशीप येवजण सरकाराकूच न्हय जाल्यार गोंयांक नवी दिका दाखोवपी कशी जातली? भासाभास जाल्या? नव्या शिक्षण धोरणांत कुशळटायेक चड म्हत्व आसा, उद्देगांची उबारणी थंय जातली. उच्च कुशळटायेचें मनीसबळ देशांतच उरतलें, देशाचे महासत्तेची तीच दिका अशें हालींच राष्ट्रपतीनीय एका भाशणांत सांगलां. गोंयांतल्यान अॅप्रेंटिसशीप येवजण ही कुशळटायेचीच एक खांदी, ती उंचायेर वचची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
