भांगरभूंय | प्रतिनिधी
सरकार आत्मनिर्भर जावपाचे दिकेन पावलां मारता. अर्थीक महासत्ता जावपा खातीर आत्मनिर्भर जावप गरजेचें आसा. ऑटोमोबायल इंडस्ट्री भारताच्या ह्या प्रवासांत म्हत्वाचें योगदान दिवपाक शकता, अशें सरकराक दिसता. ते नदरेनूय काम चालू आसा. 5 वर्सांत भारताक संवसारीक मळार ऑटोमोबायल इंडस्ट्रीच्या मळार अव्वल करपा खातीर सरकार दीस-रात एक करता. हालींच भारतान जपानाक फाटीं घालून हे वळेरेंत तिसरो क्रमांक मेळयला. भारता मुखार आतां दुसऱ्या क्रमांका वेलो चीन आनी पयल्या क्रमांका वेल्या अमेरिकेचें आव्हान आसा. ह्या दोनूय देशांक फाटीं घालतले जाल्यार इंधनाचे नदरेन आत्मनिर्भर जावप गरजेचें आसा. म्हामार्ग, येरादारी मंत्री नितीन गडकरी हांणी नेमकें ह्याच गजालीचेर भर दिला.
आत्मनिर्भर भारत, विकसीत भारत हो नारो घेवन फुडें वतना योग्य वेळार योग्य निर्णय घेवपाक जाय. केंद्र सरकार हें विशीं जागृत आसा, आनी ताचोच एक भाग म्हणल्यार ई-20 पेत्रोल देशभर लागू करप. ई-20 पेत्रोलाची घोशणा जायत सावन सोशल मिडियाचेर हें विशीं नकारात्मक सूर दिसपाक लागला. ई-20 पेत्रोलान गाडयो बेगीन कावलाक येतल्यो. ई-20क सहाय्यक नाशिल्ल्यो गाडयो बेगीन पेड्ड्यार जातल्यो. जावं त्यो हालींच घेतल्या. तेन्ना सरकार नेमकें कितें करपाक सोदता? कोणाची भर घालता? गरिबांच्या, मध्यमवर्गीयांच्या मुळार कित्याक उठला? अशें तरेचें आशय आशिल्ले व्हिडियो सोशल मिडियाचेर पडपाक लागल्यात.
ई-20 पेत्रोल म्हणल्यार 80 टक्के शुद्ध पेत्रोल आनी 20 टक्के इथेनॉल. पयलींच्या काळांत म्हणल्यार तिशेक वर्सां पयलीं 100 टक्के शुद्ध पेत्रोल मेळटालें. मात, प्रदुशणाक लागून हें पेत्रोल परवडना जालें. तशेंच बीएस 2 गाडयो बंद करून बीएस 3 गाडयो हाडून प्रदुशणाचेर नियंत्रण मेळोवपाचो यत्न जालो. टू स्ट्रोक मोटारसायकली बंद केल्यो. तशेंच कार्बुरेटेड गाडयांचो काळूय फाटीं उडयलो. ह्या उपायान प्रदुशणाचेर कांय प्रमाणांत नियंत्रण आयलें. करतां करतां बीएस 4 आयलो. तोवूय काळ फाटीं पडून बीएस 6 गाडयो आयल्यो. आतां बीएस 6 पार्ट 2 गाडयो बाजारांत मेळटात. कांय तेंपान बीएस 7 येतल्यो.
आतां बीएस 6 पार्ट 2 गाडयो तयार करतना ई-20 पेत्रोल खपोवंक, पचोवंक शकता अश्यो तयार करतात. देखून ई-20 पेत्रोलाचो ह्या गाडयांचेर तसो वायट परिणाम जावचोच ना. प्रदुशण उणें जातलें. तशेंच ह्या गाडयांचो परफॉर्मन्सूय बरो आसतलो, अशी ह्या गाडयांची रचना आसा. एप्रील 2023 सावन ज्यो गाडयो येतात त्यो सगल्यो ई-20 पेत्रोल पचोवपी आसात. मात, ताचें पयलीं आयिल्ल्या गाडयांचें कितें? असो प्रस्न जायत्या जाणांक पडपाक लागला. कित्याक तर ई-20 पेत्रोलाचो ह्या गाडयांचेर कितें प्रभाव पडटलो हे अधिकारीकपणान कोणूच सांगिना. ताका लागून सगल्यां मदीं दुबावाचें वातावरण पातळ्ळां.
सोशल मिडियाचेर ई-20 पेत्रोला विशीं वेगळे वेगळे तर्कवितर्क येवपाक लागल्यात. कांय इन्फ्ल्युएन्सर तर हड्डें फोडून ई-20 पेत्रोल कशे तरेन गाडयो खातल्यो हें सांगपाक लागल्यात. ई-20 पेत्रोल हाडून सरकार स्क्रॅप पॉलिसी फाटल्या दारान येसस्वीपणान चालीक लावपाक सोदता, अशे आरोपूय जावपाक लागल्यात. गाडयो बेगीन पेड्ड्यार जाल्यार आपशींच स्क्रॅप जातल्यो. लोकांक नव्यो गाडयो घेवपा बगर पर्याय उरचो ना. हाचो ऑटोमोबायल इंडस्ट्रीक लाव जातलो. सगले चल्लां तें ऑटोमोबायल इंडस्ट्रीक मुखार हाडपा खातीर चल्लां, अशेंय इन्फ्ल्युएन्झर उलोवपाक लागल्यात.
केंद्रीय मंत्री नितीन गडकरी हांणी नेमको होच मुद्दो उखलतना आपली बदनामी करपा खातीर हें कारस्थान चल्लां. सोशल मिडियाचेर पेड कँपेन चल्लां, असो दावो केलो. ई-20 हो नवभारत निर्माणाचे दिकेन एक व्हड पावल आसा. ह्या इंधनाक लागून शेतकारांक बरे दीस येतले. भारताची पेत्रोला खातीरची भायल्या देशां वयली निर्भरता उणी जावन भारत आत्मनिर्भरतेचे दिकेन वतलो, अशें तांणी सांगलें. तें सांगतात ते मुद्दे पट्टात. संवसारीक मळार वाडट्या प्रदुशणाचो हुस्को आसा. ते फाटभुंयेर गाडयांचें प्रदुशण उणें करप हो एक बरो उपाय आसा. मात, हें करतना ई-20 पेत्रोलान सामान्य गाडयांक कांयच धोको जावचो ना, हेंवूय कोणें तरी स्पश्ट करपाक जाय, तेन्नाच सर्वसामान्य उक्त्या मनान, दोनूय हातांनी सरकाराच्या ह्या कार्याक येवकार दितलो.
दिल्लींतलीच देख घेयात, थंय प्रदुशण तेंगशेर पाविल्लें. अहवाला प्रमाण दिल्लींत रावपी मनशांचें आयुश्य 5 ते 10 वर्सांनी उणें जावपाक शकता. हातूंतल्यान बोध घेत दिल्लीकारांनी फुडाकार घेवन सरकाराच्या स्क्रॅप पॉलिसीक बरो प्रतिसाद दिवन पोरण्यो गाडयो बदलून ईव्ही गाडयो घेवपाक सुरवात केल्या. देशांतूय ईव्ही गाडयांची विक्री वाडल्या.
हेर कांय देशांनी ई-20च न्हय तर ई-27 पेत्रोलूय चलता. थंय पोरण्यो गाडयो पेड्ड्यार जाल्यात वा अचकीत बंद पडल्यात असो प्रकार जाल्लो अजून मेरेन तरी मुखार येवंक ना. मेळटा ते म्हायती प्रमाण भारतांतल्या कितल्याश्याच पेत्रोल पंपांचेर ई-20 पेत्रोल दितात. खूबश्या जाणांक ते गाडयेन घालता ते ई-20 पेत्रोल म्हूण खबर लेगीत ना. रिपोर्ट्स सांगता ते प्रमाण इंडियन ऑयलान तांचें एक्सपी 95 पेत्रोल हें ई-20चे सुधारीत पेत्रोल म्हूण एका आरटीआयक जाप दितना सांगलां. हें पेत्रोल घालपी जायते जाण आसात. हें पेत्रोल वापरून गाडयो बंद पडिल्ल्याचेंय आयकून खबर ना. तेन्ना ई-20 पेत्रोला विशीं इतलो भंय कित्याक?
गडकरी सांगता ते प्रमाण फुडल्या 5 वर्सांत भारत ऑटोमोबायल इंडस्ट्रींत अव्वल जातलो. हें सांगतना ते सगल्यो गाडयो भारतांतूच विकतले अशें सांगिना, जाल्यार निर्यात करपा विशीं सांगतात. आयचे घडयेक भारतांत जितल्यो भारतीय गाडयो खपतात, ताच्या दोब्राद गाडयो देशा भायर विकतात. अमेरिकेन भारता वेलो टॅरिफ वाडवपाचो घेतिल्लो निर्णय हाचोच एक भाग आसा. भारताची वाडटी ताकद आनी तांच्या ऑटोमोबायल इंडस्ट्रीच्या अव्वल क्रमांकाक भारताचोच धोको आसा हें वळखून ते युक्रेन-रशिया झुजाचें नांव मुखार हाडून भारताक फाटीं दवरपाक सोदता. मात, भारतान थंड तकलेन चीना बरोबर संबंद वाडोवन अमेरिकेक जाप दिल्या. चीनाच्यो गाडयो विदेशांनी खपतातूच, मात तांणी भारताक ह्या मळार फाटीं ओडपाचो विचार करूंक ना. ईव्ही गाडयेक लागपी बॅटरीचें सामान चडशें चीनांतल्यानूच येता. भारत तें विशींय विचार करून आत्मनिर्भर जावपाचो विचार करता. तशेंच डिझॅलाचीय चांचणी सुरू केल्या. डिझॅलाचेर उपाय मेळत जाल्यार प्रदुशण सामकें उणें करपाक येस येतलें. आयचे घडयेक भारतांत वर्साक पन्नासेक हजार ईव्ही बशी तयार जातात. जाल्यार ईव्ही बशींची मागणी सव्वा लाखांचेर पावल्या. मागणी पुराय करपाक लिथियम बॅटऱ्यो भारतांतूच तयार जावप गरजेचें आसा. भारत सरकार ह्या मळारूय काम करता. ट्रकूय ईव्ही स्वरुपांत येवपाक लागल्यात. पेत्रोल पंपां भशेनूच ईव्ही स्टेशनांचेंय जाळें सगल्याक पातळवपाचेर सरकार भर दिता. सरकार आंखणी करता ते प्रमाण सगलें जायत जाल्यार फुडल्या 5 वर्सांत भारत ऑटोमोबायल इंडस्ट्रींत निश्चीतच अव्वल जातलो.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
