भांगरभूंय | प्रतिनिधी
तंत्रज्ञानाच्या ह्या युगांत कितें शक्य आसा आनी कितें ना, ताची कल्पनाय मनीस करपाक शकना. सकाळीं बाजारांत आयिल्लें तंत्रज्ञान सांजवेळ मेरेन बदलता. फाटल्या कांय दिसांनी टिव्ही खबरां चॅनलांचेर पत्रकारिता करपी, खेळां सर्तींक हजर रावपी एआय रोबों विशीं खबरो, व्हिडिओ आयल्यात. तंत्रज्ञानाक लागून फुडाराक नोकऱ्यांचेर पसून हावळ येवपाक शकता….!! तशे तंत्रज्ञानाचे फायदेय आसात. यंत्रा, उपकरणांक लागून लोकांचें जिवीत ल्हव जालां. कश्ट, त्रास, मनस्ताप सोंपल्यात, हें मान्य करचें पडटलें. पयरूच गोंय सरकारान ई- मार्केटाची सुरवात केल्या. चवथ ई- मार्केट वॅबसायटीचेर आपमजत गटांनी केल्लो म्हाल उपलब्ध आसतलो. तो घरा मागोवपाक मेळटलो. स्विगी मार्फत वितरण जातलें. ही संकल्पना फक्त चवथी पुरती दवरचे नात, अशें मुख्यमंत्र्यान म्हणलां. अॅप सुरू करून फुडाराक हे सुविधेचो विस्तार करपाचो हावेस मुख्यमंत्र्यान उक्तायला. गोंयांत घरगुती खाणां, गांवठी म्हाल, परंपरीक जिनस हांची क्रेझ अजूनय आसा. वेळ नाशिल्ल्यान लोक रेडिमेड सामाना कडेन वळ्ळ्यात, देखून फुडाराक परंपरीकताये कडली ओड आनीक वाडत वतली. गोंयचे बाजारपेठेंत वावुरपी गोंयकारांनी हाचो लाव घेवंक फावो.
ई- मार्केट, ई- काॅमर्स कंपनीं खूब आसात. कांय हाॅटेलांय व्हाॅट्सअॅपाचेर जेवण, खाणां घरपोच करतात. मात, सगल्यांत लोकप्रीय आसात त्यो फ्लिपकार्ट आनी अॅमेझोन. बंगळुरूंत सचीन बन्सल आनी बिन्नी बन्सल हांणी 2007 वर्सा फ्लिपकार्ट सुरू केली. 2018 त अमेरिकेंतल्या किरकोळ बाजारपेठेचेर शेक आशिल्ल्या वाॅलमार्टान ती कंपनी विकत घेतली. कल्याण कृष्णमुर्ती तिचे सीईओ. हे कंपनीन 511 अब्ज रुपयांची उलाढाल पोरूं केल्या. 2021 परस हो आंकडो 18 टक्के चड आसा. भारतांत फ्लिपकार्टाचेंच राज्य आसा. फाटोफाट अॅमेझोन आसा. अमेरिकेच्या अॅण्डी जेसीची ही कंपनी. तिणें भारतांत पोरूं 214.62 अब्ज रुपया उलाढाल केल्ली. तर संवसारांत 514 अब्ज डाॅलर. हाचे वयल्यान ह्या ई- मार्केट मळाचेर अर्थीक नदरेन कितली संद आसा, तें सोंपेपणी कळटलें. जाय ती फक्त इत्साशक्त आनी खूब खूब मेहनत!
राज्यांतल्या साबार हाॅटेलांनी स्वीगी, झोमॅटो आनी हेर कंपनीं कडेन कबलात करून आपले जिनस खपोवपाक सुरवात केल्या. तांकां लोकांचोय तेंको मेळटा. मात ह्या वेव्हारांत सामकी म्हत्वाची गजाल म्हणल्यार दर्जो. खाणां- जेवणांचो दर्जो जितलो बरो तितली ताका चड मागणी. मात, एक फावट पसून संबंदीत विक्रेतो आपणाक फटयता ही भावना गिरायकाच्या मनांत निर्माण जाली जाल्यार धंद्याक मार बसपाक उशीर लागना. ई- मार्केटा वरवीं गोंयच्या आपमजत आनी हेर बायलां गटांची उत्पादनां बाजारांत वतलीं तांणीय ही गजाल मतींत दवरप गरजेचें. लोकांक घरगुती- गांवठी जिनस, सामानाची आवड म्हणटकूच ताच्या माथ्यार कितेंय थापलें जाल्यार ते तो घेतले, असो समज कोणें करून घेवचो न्हय. एक वेळ मोल वाडयल्यार उपकारता, मात दर्ज्या कडेन तडजोड नाका. गोंयच्या बाजारांत अशेंय कांय घरगुती उद्देग आसात, जांणी फाटल्यान वर्स भरांत जिनसाचें मोल दुपेट वाडयलां. मात मागणी उणीं जावंक ना. हाचें एकसुरें कारण दर्जो! अर्थांत सगल्यांकूच म्हारग जिनस विकत घेवप परवडना. तशें आसलें तरी सवाय म्हालाच्या दर्ज्या कडेन खेळ नाकात. अन्न आनी वखदां प्रशासनानूय हाचेर आनी एकूणच सगल्याच म्हालाचेर लक्ष दवरपाक जाय. चवथीक तपासलें काय नवरात्रांक आनी मागीर बद्द दिवाळेक, अशें जावंक फावना.
ई- मार्केट चालीक लायतना गोंयचो खाशेलो जिनस खंयचो ताचेरूय विचार जावचो. नेवरी, तरातरांचे फोव, शेव, चिवडो, फेणोरी, दोदोल, सान्नां असले जिनस मुखार हाडून ताचें मार्केटींग केल्यार गोंयची खास खाणां म्हूण तांकां वळख मेळटली. मुगां गांठी, उडदमेथी, पातोळ्यो, मणगणें हांकां मेळ्ळ्या तशी. ई- मार्केट संकल्पना येसस्वी करपाक अॅप चलयतले तांकां मेहनत घेवची पडटली, तेच बरोबर गोंयकारांकूय थळावेच जिनस विकत घेतलों, हो निश्चेव करचो पडटलो. गिरायक ब्रॅण्डेड म्हाल सोडून आपले फाटल्यान लागतले हे खातीर विकप्यांक दर्जेदार, आकर्शक म्हाल तयार करचो पडटलो. गांवांगांवांनी सगले लघू उद्देजक कामाक लागले जाल्यार हें सहज शक्य आसा. रोजगाराच्या मळाचेरूय क्रांती जातली.
ई- मार्केटाचो विस्तार गोंया भायरूय करपाचो सरकाराचो विचार आसा. पूण ती फुडली गजाल. सध्या गोंया पुरतें येस मेळोवया. यत्न केल्यार हें सहज शक्य आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
