भांगरभूंय | प्रतिनिधी
हो यत्न सामान्य मनशाच्या जिणेचो दर्जो सुदारपाक आनी तिगोवन दवरपाक मदत करतलो, ते भायर मार्केटींगाक व्हड प्रमाणांत चालना दितलो. खास करून राज्यांतल्या शिकिल्ल्या बेकार तरणाट्यां मदीं आपरोजगाराक चालना दिवपा खातीर हें पावल म्हत्वाचें थारतलें.
विज्ञान आनी तंत्रगिन्यानाचे नेटान उदरगतीक लागून संवसार हो ‘जागतीक गांव’ जाला आनी लोकांक खूब नेटान म्हायती मेळपाक लागल्या. संवसारभरांतल्या ताज्या घडणुकां विशींय फावो ती म्हायती मेळटा. डिजिटलीकरणाच्या आगमनान संदी निर्माण जाल्ल्यान, गिरायकांचें समाधान जाता आनी कर्मचाऱ्यांची उत्पादकताय वाडटा. हें मतींत दवरून आपल्या लोकांच्या कल्याणा खातीर कटिबद्ध राज्य सरकारान ई- मार्केट सुरू करपाक सुरवात केल्या. स्वयंपूर्ण गोंय कार्यावळी खाला डिजिटल उपक्रमांतल्यान गोंयांतल्या उद्देजकांक आनी बचत गटांक सशक्त करपाच्या हेतान हातांत घेतिल्ली ही एक अभिनव कल्पना.
आपरोजगार आनी वाडट्या बेकारीची समस्या उणी करपा खातीर ई- बाजार हें एक निर्णायक पावल. हालींच गोंयांत जाल्ल्या गणेश चतुर्थी वेळार ई- बाजाराचें यश दिसून आयलें, बायलांक स्वताची मजत करपी गट आनी ल्हान उद्देजकांनी 800 वयर ऑर्डरीं सयत ह्या उपक्रमाक उमेदीन प्रतिसाद दिलो. ऑनलायन सेवा घरांतल्यान वा इंटरनॅट ऍक्सॅस आशिल्ल्या खंयच्याय सुवातींचेर वेगवेगळ्या सेवांनी प्रवेश करपाची सुविधा दिता. ही सेवा भौतिक प्रवासाची गरज काडून उडयता आनी वापरप्यांक 24/7 सेवेचो लाव घेवंक मेळटा.
आमी म्हणूं येता की ई-बाजार सुरू करप ही काळाची गरज आशिल्ली, कारण ताका लागून गोंयांतल्या गांवगिऱ्या कारागिरांच्या आनी उद्देजकांच्या सशक्तीकरणाच्या नव्या युगाक वाट मेकळी जातली. रोजगाराचे नदरेन भारतीय अर्थवेवस्थेंत शेतकी क्षेत्र हो सगळ्यांत म्हत्वाचो उद्देग आसून हे नदरेन ही सेवा म्हत्वाची आसा. शेतकी क्षेत्रांतल्यान 15.1 कोटी परस चड लोकांक उदरनिर्वाह मेळटा. सुमार ६० टक्के भारतीय लोक उद्देगीक क्षेत्रांत काम करतात. भारतीय लोकसंख्येचे ५८ टक्के लोक उदरनिर्वाहाक शेतवडीचेर आदारून आसात. गोंयांत लेगीत राज्यांतली 35 टक्के लोकसंख्या अंशतः वा पुरायपणान शेतवडीचेर आदारून आसा.
ई-बाजार सुरू जावचे पयलीं शेतकारांक, खास करून दोंगराळ वाठारांनी उत्पादन करपी आनी घरगुती उत्पादनांक आपलें उत्पादन विकपाक योग्य विपणन सुविधा मेळनाशिल्ली. ताका लागून शेतकी उत्पादन वाडोवपा खातीर वेगवेगळ्या कार्यावळीं वरवीं सरकारान नवे उपक्रम/ उपाय केल्यात तरी शेतकार समाजा कडल्यान ताका व्हडलोसो उमेदीचो प्रतिसाद मेळनाशिल्लो. ई- बाजार सुरू करपाचो हो यत्न शेतकारांक आनी उद्देजकांक वरदान थारतलो. हाका लागून शेतकारांक आनी उद्देजकांक व्हड प्रमाणांत शेतकी वेवसाय हातांत घेवपाक प्रेरणा मेळटली. इतलेंच न्हय तर तांचो उदरनिर्वाह तिगून उरतलो आनी उत्पादनाक बरो परतावो मेळटलो. आतां शेतकार, बायलां सयत शिकिल्ल्या बेकार तरणाट्यांनी सरकाराच्या नव्या उपक्रमांचो फायदो घेवपाक, नव्या तंत्रगिन्यानाचो आनी गिन्यानाचो सुसज्ज करपाचो आनी ताचो फायदो गांवगिऱ्या भौसाच्या दारांत पावोवपाक मुखार येवपाचो वेळ आयला.
चवथ ई -बाजाराच्या उपक्रमाक मेळिल्लो व्हड प्रतिसाद मतींत दवरून, सामान्य मनशाच्या कल्याणा खातीर बांदिल आशिल्ल्या राज्य सरकारान आतां दसऱ्या निमतान स्वताचो ई- बाझार सुरू केला, जाका लागून विक्री खातीर ऑनलायन प्लॅटफॉर्म मेळटलो. भारतभर गोंयचें जेवण, हस्तकला आनी हेर वस्तू उपलब्ध जातल्यो. तशेंच ह्या उपक्रमांतल्यान सेवा केंद्र, मोबायल अॅप्लिकेशन तयार करपाचीय सरकाराची येवजण आसा. हो यत्न सामान्य मनशाच्या जिणेचो दर्जो सुदारपाक आनी तिगोवन दवरपाक मदत करतलो, ते भायर मार्केटींगाक व्हड प्रमाणांत चालना दितलो. खास करून राज्यांतल्या शिकिल्ल्या बेकार तरणाट्यां मदीं आपरोजगाराक चालना दिवपा खातीर हें पावल म्हत्वाचें थारतलें.
– प्रकाश एस. नायक,
म्हायती अधिकारी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
