भांगरभूंय | प्रतिनिधी
फराळ, माटोळी मेळटली ऑनलायन
भांगरभूंय । प्रतिनिधी
पणजीः पोरूं भशेन अंदूं लेगीत गोंय सरकारान चवथी निमतान ई- चवथ बाजार सुरू केला. लोकांक ऑनलायन पद्दतीन 6 तरेचे फराळ आनी माटोळीचे 14 तरांचे नग ह्या बाजारांतल्यान खरेदी करपाक मेळटले, अशी म्हायती मुख्यमंत्री डॉ. प्रमोद सावंत हांणी बुधवारा पत्रकारां कडेन उलयतना दिली.
चवथ हो गोंयचो सगळ्यांत व्हड सण. चवथीच्या काळांत फराळ तशेंच माटोळीक खूब मागणी आसता. तेच खातीर पोरूंच्यान सरकारान फराळ आनी माटोळीचे नग लोकांक उपलब्ध करून दिवचे खातीर ई- चवथ बाजार सुरू केला. अंदूंय बाजाराचें आयोजन केलां. ह्या बाजारांत गोंयची नेवरी (पांच नग), बेसन लाडू (7 नग), चक्री (200 ग्राम), शंकरपाळी (200 ग्राम) चिवडो (200 ग्राम) आनी फेनोरी (200 ग्राम) हे फराळाचे नग मेळटले.
ह्या कोम्बो पॅकाचें मोल 600 रुपया दवरलां. दोनशे पाकिटांची ऑर्डर दिल्यार 10 टक्के सवलत मेळटली. जाल्यार पयल्या 100 ऑर्डरींक फुकट घरपोच सुविदा दितले. 2 सप्टेंबर मेरेन ऑर्डरी घेतले. माटोळींत 14 नग आसात. ताचें मोल 1,100 रुपया दवरलां. शंबर ऑर्डरी दिवप्याक दरांत 25 टक्के सवलत दितले. ते खातीर लेगीत 2 सप्टेंबर मेरेन बुकींग करचें पडटलें. क्यूआर कोड, 9262626262 हो व्हॉट्स अॅप नंबर तशेंच swayampurnagoa.com हे बॅबसायटी वरवीं लोकांक हें साहित्य खरेदी करपाक मेळटलें, अशें सरकारान जारी केल्ल्या प्रसिद्धी पत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
