भांगरभूंय | प्रतिनिधी
ईस्ट बंगालान इंडियन सुपर लिगेंत (आयएसएल) काल धपको बसपी निकालाची नोंद जाली. पांच मॅचींनी फक्त एक जैत मेळोवपी ईस्ट बंगालान येजमान बंगळुरू एफसीक घरच्या मैदानाचेर हारोवपाचो पराक्रम केलो.
हे मॅची पयलीं बंगळुरून श्री कांतीरवा स्टेडियमाचेर 32तल्यो फक्त चार मॅची वगडायिल्ल्यो. ईस्ट बंगाला आडची मॅच बंगळुरू सहज जिखतलो अशें सगल्यांक दिसतलाें. पूण, ईस्ट बंगालान सगल्यांक धपको दिसोल. उत्कृश्ट डिफॅन्स आनी आक्रमणांत शिटूकसाण दाखयत ताणें 1-0 अशें जैत जोडलें.
क्लेटन सिल्वान 69व्या मिनटाक केल्लो गोल निर्णायक थारलो. अंदूंच्या हंगामांतलें ईस्ट बंगालाचें हें फक्त दुसरें जैत आसा.
10व्या मिनटाक चेरीस किरियाकोनान ऑन टार्गेट मारिल्लो यत्न बंगळुरुचो गोलकीपर गुरप्रीत संधून सहज रितीन आडायलो. 13व्या मिनटाक झेवियर हर्नाडेझाचे सुंदर कामगिरीन सुनील छेत्रीक गोल करपाची संद निर्माण केल्ली. पूण, 6 यार्ड बॉक्सांत ईश्ट बंगालाचो गोलकीपर कमलजीत सिंगान ब चाव केलो. 22व्या मिनटाक इव्हान गोंजालेजान बॉक्साच्या तोंकाचेर उदांता सिंगाक उडयलो आनी बंगळुरूक फ्री कीक मेळ्ळी. हर्नांडेझाचो फ्री किकी वयलो यत्न ऑफ टार्गेट गेलो. 29 व्या मिनटाक क्लेयटन सिल्वान ऑन टार्गेट यत्न केल्ल्यान बंगळुरूच्या डिफॅण्डराचो गोंदळ जालो. ईस्ट बंगालाचें अंदूंच्या हंगामांतलें प्रदर्शन पळयलें जाल्यार तांच्या कडल्यान चड आस्त नाशिल्ली. पूण, तांणी बचावांनी केल्ली कामगिरी तोखणाय करपा सारकी आशिल्ली. तांणी बंगळुरूच्या फॉरवर्ड खेळगड्यांक बांदून दवरले.
क्लेयटन सिल्वा गोल करपाच्यो संदी तयार करतना बंगळुरूच्या डिफॅण्डरांक व्यस्त दवरले. येजमान बंगळुरू परस पयल्या अर्दांत ईस्ट बंगालान शेक दवरलो.
सगल्याच विभागांनी तांचो खेळ बंगळुरू जशाकतशें जाप दिवपी आशिल्लो. 45 मिनटांच्या ह्या खेळांत ईस्ट बंगाला कडल्यान 2 ऑन टार्गेट यत्न जाले, मध्यांतरा उपरांत बंगळुरून आक्रमक खेळ करपाक सुरवात करतना कांय मिनटांनीच 2-3 संदी निर्माण केल्यो. रॉय कृष्णा, उदांता सिंग, ब्रुनो सिल्वा हांच्या कडल्यान बरो खेळ जालो.
जॉर्डन ओडोहर्टीक दुखापत जाल्ल्यान ताका मैदान सोडचें पडलें, ईस्ट बंगालान ताचे सुवातेर अॅलेक्स लिमाक मैदानांत हाडलो. लिमा आयल्या उपरांत ईस्ट बंगालाच्या आक्रमणाची धार आनीक खर जाली.
62व्या मिनटाक रॉय कृष्णाक आयती संद मेळिल्ली. कृष्णाक फक्त गोलकीपराक चकोवपाचें आशिल्लें. पूण, ताका शॉर्ट टार्गेटाचेर दवरपाक जमलो ना.
69व्या मिनटाक ईस्ट बंगालान खातें उगडलें. क्लेयटनान मेळिल्ले संदीचो फायदो घेत गोल केलो आनी ईस्ट बंगालाचें खातें उगडलें. 73व्या मिनटाक क्लेयटनाक गोल करपाची आनीक एक संद फावो जाल्ली. पूण, बॉल गोलपोस्टाक तेंकून गेलो. अखेरेक बंगालान आपली आघाडी कायम राखत जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
