भांगरभूंय | प्रतिनिधी
सॅम पित्रोदा हांचें वादग्रस्त विधान
नवी दिल्ली, खबरां संस्था : काँग्रेसीचे फुडारी सॅम पित्रोदान आयज आनीक एक वादग्रस्त विधान केलां. भारताचे विविधतायेंत एकवट आसा अशें सांगून भारतांतल्या वेगवेगळ्या वाठारांनी भारतीय लोक कशे दिसतात हाचेर तांणी टिप्पणी केल्या. तांणी भारतीयांक चीनी, अरब, अस्तंती आनी आफ्रिकन अशें म्हणलें. दक्षिण भारतांत रावपी लोक आफ्रिकन आनी ईशान्य भारतांतले लोक चीनी लोकां सारके दिसतात, अशें पित्रोदान म्हणलें. भाजपान आतां तांचेर खर टिका केल्या.
‘द स्टेट्समन’क दिल्ले मुलाखतींत भारताच्या लोकशाये विशीं उलयतना पित्रोदान सांगलें, फाटल्या 75 वर्सांत भारतांतले लोक भावपणान एकठांय रावत आयल्यात. ह्या काळांत कांय मतभेद जाल्ले आसूं येतात, पूण ते तितले पुरतेच आशिल्ले. भारतांत एके वटेन ईशान्ये कडले लोक चीनी, अस्तंते कडले लोक अरबां सारके दिसतात जाल्यार उत्तर भारतांतले लोक घडये गोरे अस्तंती लोकां सारके आनी दक्षिणे कडले लोक आफ्रिकन लोकां भशेन दिसतात. पूण ताचो आमच्या जगण्याचेर परिणाम जावंक ना. आमी सगळे भाव- भयणीं प्रमाण एकठांय रावन वैविध्य आशिल्लो हो देश एकत्र दवरपाक शकले. वेगवेगळ्या भाशांचो, वेगवेगळ्या धर्मांचो, संस्कृताय आनी खाणाच्या परंपरांचो आमी सगले आदर करीत आयल्यात. हो भारत देश, जाचेर आमी सगळेच विस्वास दवरतात.
वंशवादी टिप्पणी आशिल्ल्याची भाजपा कडल्यान टिका
पित्रोदाच्या निवेदना उपरांत आसामाचे मुख्यमंत्री हिमंत विश्व सर्मान ‘एक्स’चेर पोस्ट करून ह्या विधानाची दखल घेतली. तांणी म्हणलें, सॅम भाय, हांव ईशान्य भारतांतल्यान आयलां. पूण हांव भारतीय लोकां सारको दिसता. आमचो देश विवीधतायेन भरिल्लो आसा. आमी वेगळे दिसूं येतात पूण आमी सगळे एकूच.
कंगनाची टिका
अभिनेत्री आनी आतां राजकारणांत देंविल्ल्या कंगना रानौत हांणी सॅम पित्रोदाच्या निवेदनाचेर टिका केल्या. पित्रोदाचें हें विधान वंशवादी आनी फूट घालपी आसा. हो मनीस राहुल गांधी हांचो मार्गदर्शक आसा, अशें कंगनान सांगलें.
कंगनान म्हणलें, सॅम पित्रोदा हो राहुल गांधीचो गुरू. ताणें केल्लीं वंशवादी आनी फूट घालपी विधानां आयकात. ताणें भारतीयांक चीनी आनी आफ्रिकन अशें म्हणलें. काँग्रेसीक लज दिसूंक जाय.
वारसाहक्क कर विधानाचेर जाल्लो वाद
एप्रीलांत सॅम पित्रोदान वारसाहक्क कराचेर केल्लीं टिप्पणीं काँग्रेसीच्या आंगलट आयिल्ली. ह्या प्रस्नाचो फायदो घेवन भाजपान प्रचार सभांनी काँग्रेसीचेर खर टिका केली. सॅम पित्रोदान भारतीय अर्थवेवस्थे विशीं उलयतना अमेरिकेंतल्या कराची गजाल सांगली. “अमेरिकेंत वारसाहक्क कर नांवाचो कर आसा. मनशान 10 कोटी डॉलर मोलाची संपत्ती एकठांय केल्या जाल्यार ताच्या मरणा उपरांत ताच्या भुरग्यांक सादारणपणान 45 टक्के संपत्ती मेळटा. उरिल्ली 55 टक्के सरकार आपल्या ताब्यांत घेता. हो एक वेगळोच कायदो. ह्या कायद्या प्रमाण तुमी तुमच्या जिवितांत संपत्ती मेळयल्या. पूण मरणा उपरांत तुमी ती लोकां खातीर सोडून वचपाक जाय. सगळी संपत्ती न्हय, पूण उणीच अर्दी संपत्ती. म्हाका दिसता हें न्याय्य आसा’’, अशें पित्रोदान हे चर्चेंत सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
