भांगरभूंय | प्रतिनिधी
उल्हास तुयेंकारः गोंयभर चार्जींग स्टेशनां उबारपाचें उतर
भांगरभूंय । प्रतिनिधी
पणजीः पर्वरें ईव्ही बशीं खातीर स्वतंत्र चार्जींग सुविधा उबारतले आनी ते दिशेन आमचें काम चालू आसा. ते भायर ईव्ही बशींचो आंकडो वाडत वतलो तशें आमी गोंयभर चार्जींग स्टेशनाचें जाळें उबारतले, अशें कदंब म्हामंडळाचे अध्यक्ष उल्हास तुयेंकार हांणी सांगलें.
सध्या गोंय विद्यापीठ आनी कांपाल कदंब बशीं खातीर चार्जींग पॉयंट आसात. आमी पांवड्या पांवड्यार तातूंत वाड करतले. पर्वरे व्हडले चार्जींग स्टेशन उबारपा खातीर आमी सुवात पळयल्या. बेगिनूच थंय अत्याधुनीक चार्जींग सुविधा उबी जातली, अशें तुयेंकार हांणी सांगलें.
स्मार्ट सिटी खाला आमकां 48 बशीं आयल्यात आनी तातूंतल्यो फक्त 6 चालीक लागल्यात. स्मार्ट सिटींतल्या रस्त्यांचें काम अजून जावपाचे आसा, हे खातीर उरिल्ल्यो बशी अजून चालीक लावंक नात. दोन म्हयन्यांनी उरिल्ल्यो बशी रस्त्यार धांवतल्यो, अशी म्हायती तुयेंकार हांणी दिली.
पणजे बस स्टॅण्डार सध्या चार्जींग स्टेशन ना, फक्त मडगांव बस स्टॅण्डार चार्जींग स्टेशन आसा. थंय चार्जींग सुविधा येवची म्हूण आमी प्रस्ताव मांडला. ते भायर म्हापशें बस स्टॅण्डाटेक आमी चार्जींग स्टेशन उबारपाक सुरवात करपाचे आसात, अशें तांणी सांगलें. आमकां शंभर बशी येवपाच्यो आसातय तातूंतल्यो फक्त चारूच बशी आयल्यात. मे मेरेन ते आमकां सगळ्यो बशी दिवपाचे आशिल्ले, पूण मुजती भितर बशी दिवंक नाशिल्यान आमी तांकां 1 कोटी रुपयांचो दंड दिला. सप्टेबर मेरेन 50 बशी येतल्यो, अशें तुयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
