ईव्हिएम मशिनां हो गोलमाल, पारदर्शक, वेंचणुके खातीर बॅलेट पेपराचो वापर करात

भांगरभूंय | प्रतिनिधी

-सर्वोच्च न्यायालयाचे अॅड. भानूप्रताप​ सिंग हांची मागणी

वास्कोः ईव्हिएम मशीन हो सगलो गोलमाल अाशिल्ल्यान वेंचणूक पारदर्शक तशेंच मुक्त आनी शांतताय वातावरणांत जावपाक शकना. ते खातीर वेंचणुको ईव्हिएम मशीनां वरवीं घेनासतना त्यो बॅलेट पेपरा वरवीं घेवच्यो, अशी आमची मागणी आसा. हे मागणेक देशभरांतल्यान व्हड प्रतिसाद मेळटा, असो दावो सर्वोच्च न्यायालयाचे अॅडव्होकेट भानूप्रताप सिंग हांणी केला.

‘ईव्हीएम हटाव, देश बचाव’ ह्या बॅनरा खाला ‘गोवन्स अगेन्स ईव्हिएम’ न आयोजीत केल्ले पत्रकार परिशदेंत ते उलयताले.

ह्या वेळार ईव्हिएमा विशीं व्हड दुबाव उक्तायतना मशीन सहजपणान हॅक जावपाक शकता, असो दावो तांणी केलो. ते खातीर लोकसभा वेंचणुकेंत मतदाना खातीर बॅलेट पेपराचो वापर करचो. बॅलेट पेपरा वरवीं वेंचणूक घेवंक ना, जाल्यार आमी वगी रावचे नात. इव्हिएम मशिनाक लागुनूच भाजप जिखता, असो आरोप तांणी केला. तेच इव्हिएम मशीन तयार करतात. तातूंत चिप्स आनी सॉफ्टवॅर कोड तेच घालतात. हाका लागून मोदी जिखतात हातूंत दुबाव ना. वेंचणूक आयोग फक्त नांवा पुरतो आशिल्ल्याचे तांणी सांगलें.

ईव्हिएम मशिनां प्रमाणीत, सत्यापीत करूंक नात. ह्या मशिना विशीं दुबाव आशिल्ल्यान मुक्त वातावरणांत आनी पारदर्शक वेंचणूक जावपाक शकना, अशें तांणी म्हणलें.

18 वर्सा पिराय अानी ताचे वयल्या सगल्यांची नांवां मतदार वळेरेंत आसपाक जाय. थंय लेगीत घोटाळो जाला. ते खातीर आमी 5 फेब्रुवेरींक नवी दिल्लींत पत्रकार परिशद घेवन हो घोटाळो लोकां मुखार उक्ताडार हाडटले, अशें तांणी म्हणलें.

तांणी वेंचणूक आयोगाचेर खर टिका केल्या. ह्या वेळार टेक्निकल एक्स्पर्ट अतुल पटेल आनी ईव्हिएम आनी ​व्हिव्हिपॅट मशिना विशीं प्रात्यक्षीक करून दाखयली. व्हिव्हिपॅट मशिनांत मतांची संख्या कशी बदलता हे विशीं तांणी म्हायती दिली. ह्या मशिनांक लागुनूच भाजपान मध्यप्रदेश, छत्तीसगड, राजस्थानांत जैत मेळयलां, असो दावो सर्वोच्च न्यायालयाचे अॅडव्होकेट भानूप्रताप सिंग हांणी केला.