भांगरभूंय | प्रतिनिधी
नवी दिल्ली, खबरां संस्था ः फेमा म्हळ्यार ‘विदेशी विनिमय वेवस्थापन’ कायद्या खाला देशांतल्या वेगवेगळ्या शारांनी धाड घालून सक्तवसुली संचालनालयान (ED) कोटी रुपयांचें चलन जप्त केलां. अजापाची गजाल म्हणल्यार एकाच सुवातेर फ्रन्ट लोड वॉशिंग मशीनांत 500 रुपयाच्या नोटांचीं बंडलां लिपोवन दवरिल्लीं सांपडलीं. ही धाड घाले उपरांत तांचो 47 बँक खात्यांचो वेव्हार बंद केलो.
मेळिल्ले म्हायती प्रमाण ईडीन दिल्ली, हैदराबाद, मुंबय, आनी कोलकातातल्या वेगवेगळ्या वाठारांत धाड घाली. परकी चलनाच्या उल्लंघना संबंदी ईडीन कॅप्रिकॉर्न शिपिंग अँड लॉजिस्टिक प्रायव्हेट लिमिटेडचे संचालक विजय शुक्ल आनी संजय गोस्वामी हांच्या सुवातेर धाड घाली. हे धाडींत 2.54 कोटी रोख रक्कम जप्त केल्या. तशेंच कांय कागदपत्रां आनी डिजिटल उपकरणाय जप्त केल्यांत.
शुक्ल आनी गोस्वामी हांचे मालकीच्या धाड घाल्ले कंपनींनी हिंदुस्तान इंटरनॅशनल, लक्ष्मीटन मॅरीटाइम, राजनंदिनी मेटल्स लिमिटेड, भाग्यनगर लिमिटेड, स्टवार्ट अलॉइज इंडिया प्रायव्हेट लिमिटेड, विनायक स्टील्स लिमिटेड, वशिष्ठ कंस्ट्रकर्शन प्रायव्हेट लिमिटेड आनी संचालक तशेंच गुंतवणूकदार संदीप गर्ग, विनोद केडिया हांच्या मालकीच्या संपत्तीचेर धाड घाली, अशें ईडीन पत्रांत नमूद केला.
धाड घाल्लीं कंपनीं भारता भायर व्हड प्रमाणांत परकी चलन वेव्हारांत आसात, अशी खात्रीची म्हायती ईडीक मेळिल्ली. ह्या कंपनींनी सिंगापूरच्या गॅलेक्सी शिपिंग अँड लॉजिस्टीक आनी होरायझन शिपिंग लॉजिस्टीक कंपनीक 1800 कोटी रुपया धाडल्यात अशें ईडीन सांगलां. ह्या दोनूय कंपनींचें वेवस्थापन करपाची जापसालदारकी अँथनी डिसिल्वा कडेन आसा. अशे तरेन अनधिकृत परकी चलनाचो वेव्हार करपी लोकां आड ‘फेमा’ कायद्या खाला कारवाय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
