भांगरभूंय | प्रतिनिधी
पप्पी’स अंदर बाहर जुगार चलोवपी कंपनीचेर कारवाय
कर्नाटकांतल्या काँग्रेस फुडाऱ्याचो आस्पाव
पणजी: सक्तवसुली संचालनालयाच्या (ईडी) बंगळुरू फांट्यान कर्नाटकांतल्या एका व्हड काँग्रेस फुडाऱ्या कडेन संबंदीत आशिल्ल्या ऑफशोर आनी ऑनशोर कॅसिनोंतल्यान पप्पी’स अंदर बाहर जुगार चलोवपी कंपनीचेर कारवाय केली. ही कारवाय शुक्रारा फांतोडेर चार वरां सावन सुरू आसा. ते प्रमाण गोंयांत पणजी, कांदोळे अशा आठ सुवातां सयत कर्नाटक, मुंबय, जोधपूर आनी हेर मेळून देशांत 30 सुवातांनी धाडी सुरू आसात. हातूंत व्हड प्रमाणां रोख रकमे सयत हेर दस्तावेज जप्त केल्यात.
मेळिल्ले म्हायती प्रमाण, बेकायदो सट्टेबाजा कडेन संबंदीत मनी लॉड्रींग प्रकरणाचो भाग म्हूण ईडीच्या बंगळुरू फांट्यान कारवाय केली. ते प्रमाण गोंयांत पणजेंतल्या मांडवी न्हंयेंत आशिल्ल्या पांच कॅसिनों सयत पाटो आनी कांदोळे सयत हेर 30 सुवातांनी कारवाय केली. कर्नाटकांतलो काँग्रेस फुडारी गोंयांतल्या कॅसिनोंत पप्पी’स अंदर बाहर जुगार चलयतालो. हातूंत मनी लाँड्रींग जायत आशिल्ल्याचें मुखार आयले उपरांत ईडीन कर्नाटका सयत गोंयांत पांच मांडवी न्हयेंतले कॅसिनों सयत कांदोळे, पाटो आनी कळंगूट ह्या तीन सुवातांनी धाडसत्र सुरू आसा. तशेंच चित्रदुर्ग हांगा स, बंगळुरू 10, जोधपूर तीन, हुबळी एक आनी मुंबय दोन अशा 30 सुवातांचेर धाडी घाल्यात.
गोंयांतल्या कॅसिनोंत पपीज कॅसिनो गोल्ड, ओशन रिव्हर्स कॅसिनो, पपीज कॅसिनो प्रायड, ओशन 7 कॅसिनो आनी हेर कॅसिनोचो आस्पाव आसा. तशेंच संबंदीत काँग्रेसीच्या फुडाऱ्याच्या वांगड्याच्या कींग 567, राजा 567, पपीज 003 आनी रत्ना गेमींग सारक्या नांवांनी खूबशीं बेकायदो बेटींग वॅबसायटीर कारवाय केल्या. ही कारवाय शुक्रारा रातीं उसरां मेरेन सुरू आशिल्ली.
मजगतीं, गोंय पुलिसांच्या गुन्यांव फांट्यान कांदोळी वाठारांत सुरू आशिल्ल्या पपीज कॅसिनो गोल्ड ह्या कॅसिनोचेर खर कारवाय केल्ली. हे कारवायेंत 11 जाणांक अटक केल्ली. उपरांत तांची जामिनाचेर सुटका केल्ली. दुबावितां कडल्यान सुमार 35 लाख रुपयांचे जुगारा खातीर वापरिल्ले साहित्य जप्त केल्लें. गुन्यांव फांट्याचे कारवाये वेळार ‘पप्पीज कॅसिनो गोल्ड’ हांगा बेकायदो पद्दतीन ‘अंदर बाहर’ नांवाचो लायव्ह कार्ड गेम सुरू आशिल्ल्याचें मुखार आयलें.
फातोड्डेंचे आमदार विजय सरदेसाय हांणी हालींच सोंपिल्ल्या विधानसभा अधिवेशनांत कॅसिनोचो मुद्दो सभाघरांत उपस्थीत करून अशा प्रकारांचेर खर कारवाय जावची अशी मागणी केल्ली. तशेंच विजय सरदेसाय हांणी आपल्या ट्विटर हँडलाचेर एक व्हिडियो पोस्ट केल्लो. तातूंत तांणी तांच्या पंगडान 15 जुलय दिसा कॅसिनो गोल्ड, 27 जुलय दिसा कॅसिनो अॅटलांटीज आनी 3 ऑगस्ट दिसा फिनिक्स कॅसिनो हांगा स्टींग ऑपरेशन करून कशे पद्दतीन जुगार सुरू आशिल्ल्याची म्हायती दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
