भांगरभूंय | प्रतिनिधी
केंद्रीय रानां, पर्यावरण मंत्र्यां कडेन मुख्यमंत्र्यांची चर्चापणजी : अस्तंत घांट जैव संवेदनशील वाठारांतल्यान (ईएसए) राज्यान मागणी केल्ले प्रमाण, 21 गांवां कुशीक काडपाचे उतर केंद्रीय पर्यावरण, रानां आनी हवामान बदल खात्याचे मंत्री भूपेंद्र यादव हांणी मुख्यमंत्री डॉ. प्रमोद सावंत हांकां दिलां. दिल्लींत मुख्यमंत्री तांणी सीझॅडएमपी 2019 बेगिनांत बेगीन निश्चीत करपाची मागणी केली.
मुख्यमंत्री डॉ. प्रमोद सावंत हांणी दिल्लींत केंद्रीय गृहमंत्री अमीत शाह, केंद्रीय अर्थमंत्री निर्मला सीतारामन आनी केंद्रीय पर्यावरण, रानां आनी हवामान बदल खात्याचे मंत्री भूपेंद्र यादव हांची भेट घेतली. भेटीत तरेकवार विशयांचेर चर्चा जाली. केंद्रीय गृहमंत्री अमित शाह हांचे कडेन राजकी चर्चा जाल्ल्याची म्हायती मुख्यमंत्री डॉ. प्रमोद सावंत हांणी दिली.
केंद्रीय राना आनी पर्यावरण मंत्रालयान (एमओईएफ) अस्तंत घाट जैव संवेदनशील वाठाराच्या प्रस्तावीत अधिसुचोवणेचो मसुदो फाटल्या ऑगस्टांत जारी केल्लो. ह्या मसुद्यांत राज्यांतल्या 108 गांवांचो आस्पाव केला. ईएसए अधिसुचोवणेंतल्यान 21 गांवां भायर काडपा विशी केंद्रीय मंत्री भूपेंद्र यादव हांचे कडेन चर्चा जाली. हीं 21 गांवां भायर काडपाचे उतर केंद्रीय मंत्र्यांनी दिलां, अशी म्हायती मुख्यमंत्री डॉ. प्रमोद सावंत हांणी दिली.
ह्या 21 गांवां मदीं सत्तरी म्हालांतले 12, धारबांदोड्यांतले 5, सांगें म्हालातलें 3 आनी काणकोण म्हालातल्या 1 गांवांचो आस्पाव आसा. अधिसुचोवणेंतल्यान 21 गांवां भायर काडले उपरांत जैव संवेदनशील वाठारांत 87 गांवां उरतलीं. ही गावां भायर काडपाची मागणी संबंदींत वाठारांतल्या आमदारांनी लेगीत बरेच खेपे केल्या. हे मागणेच्या फाटभुंयेर नोव्हेंबरांत केंद्रीय पर्यावरण आनी रानां मंत्रालयाच्या तज्ञ समितीन गोंयाक भेट दिवन संबंदींत गांवांची पळोवणी केल्ली. पळोवणी केले उपरांत मुख्यमंत्री डॉ. प्रमोद सावंत तशेंच राज्याचे पर्यावरण मंत्री अालेक्स सिक्वेरा हांचे कडेन चर्चा केल्ली. हे बसके उपरांत आतां मुख्यमंत्री डॉ. प्रमोद सावंत हांणी दिल्लींत केंद्रीय मंत्री भूपेंद्र यादव हांची भेट घेवन चर्चा केली.
………
सीझॅडएमपी 2019 बेगीन निश्चीत करपाची मागणी
दर्यादेग वेवस्थापन आराखडो 2019 (सीझॅडएमपी) बेगिनांत बेगीन निश्चीत करपाची मागणी मुख्यमंत्र्यांनी केंद्रीय पर्यावरण मंत्र्यां कडेन केली. हो आराखडो निश्चीत केले उपरांत नुस्तेमार तशेंच परंपरीक वेवसायिकांक थाकाय मेळटली.
………
केंद्रीय गृहमंत्री अमीत शाह हांचे कडेन राजकी चर्चा
केंद्रीय गृहमंत्री अमीत शाह हांचे कडेन राजकी चर्चा जाली. पक्ष तशेंच राज्यांतल्या राजकी स्थितीची म्हायती दिली, अशें मुख्यमंत्री डॉ. प्रमोद सावंत हांणी सांगलें. राज्यांतल्या तरेकवार उपक्रमांची म्हायती दिवपा सयत तांचे कडल्यान मार्गदर्शन घेतले, अशी म्हायती मुख्यमंत्र्यांनी ट्विट करून दिल्या.
………
केंद्रीय अर्थमंत्र्यां कडेन चड निधीची केली मागणी
केंद्रीय अर्थमंत्री निर्मला सीतारामन हांची लेगीत मुख्यमंत्री डॉ. प्रमोद सावंत हांणी भेट घेतली. केंद्रीय शुल्काच्या वांट्याचो जो निधी राज्याक मेळटा तांतूत वाड करची, अशी मागणी केंद्रीय अर्थमंत्र्यां कडेन केली.
हालीच 16 व्या वित्त आयोगाच्या वांगड्यांनी राज्याक भेट दिल्ली. वित्त आयोगा उपरांत आपणे केंद्रीय अर्थमंत्र्यां कडेन लेगीत केंद्रीय शुल्काचो वांटो चड दिवचो, अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
