भांगरभूंय | प्रतिनिधी
पणजी: कर्मचारी राज्य विमा म्हामंडळान धनी आनी कर्मचारी नोंदणी प्रोत्साहन येवजण (SPREE 2025) मंजूर केल्या. ईएसआय कायद्या खाला समाजीक सुरक्षा कव्हर वाडोवपा खातीर हो एक विशेश उपक्रम आसा.
ही येवजण १ जुलय ते ३१ डिसेंबर २०२५ मेरेन कार्यरत आसतली आनी कंत्राटी आनी तात्पुरत्या कामगारां सयत नोंदणी नाशिल्ले धनी आनी कर्मचार्यांक तपासणी वा फाटल्या थकबाकीच्या मागण्यां बगर नोंदणी करपाची एक वेळ संद दिता.
SPREE 2025 खाला धनी तांचे उद्देग (युनिट्स) आनी कर्मचार्यांची ESIC पोर्टल, श्रम सुविधा आनी MCA पोर्टला वरवीं डिजिटल पद्धतीन नोंदणी करपाक शकतात, अशी नोंदणी मालकान घोशीत केल्ले तारखे सावन वैध मानतले. नोंदणी पयलींच्या काळा खातीर कसलेंच योगदान वा लाव लागू आसचो ना. तशेंच नोंदणी पयलींच्या काळा खातीर कसलीच तपासणी वा फाटले नोंदींची मागणी करचे ना.
ही येवजण पूर्वलक्षी दंडाची भिरांत पयस करून आनी नोंदणी प्रक्रिया सुलभ करून आपखोशेन नोंदणी करपाक प्रोत्साहन दिता. हे येवजणे पयलीं ठरावीक वेळार नोंदणी करूंक नासल्यार कायदेशीर कारवाय आनी आदल्या थकबाकीची मागणी जाताली. ही नवीन येवजण ह्यो अडचणी पयस करता, जाचो उद्देश नोंदणी जावंक नाशिल्ल्या आस्थापनांक आनी कामगारांक ईएसआय खाला हाडप आनी व्यापक सामाजीक सुरक्षेची खात्री दिवप हो आसा.
SPREE 2025 ही येवजण कर्मचारी राज्य विमा महामंडळान नोंदणी प्रक्रिया सुलभ करून आस्पावीत आनी सुलभ सामाजिक सुरक्षेच्या दिकेन मारिल्लें एक म्हत्वाचें पावल आसा. ही येवजण न्हय फकत मालकांक तांच्या कर्मचार्यांक नियमीत करपाक प्रोत्साहीत करता, जाल्यार चडांत चड कामगारांक, खास करून कंत्राटी क्षेत्रांतल्या कामगारांक ईएसआय कायद्या खाला गरजेच्या भलायकी आनी समाजीक लाव मेळपाची खात्री लेगीत दिता. भारतांतल्या कल्याण-केंद्रीत कामगार वेवस्थेच्या व्हिजना कडेन सुसंगत रावन आपली सेवा मजबूत करपाक आनी सगल्याक समाजीक सुरक्षेचो उद्देश पुराय करपाक कर्मचारी राज्य विमा म्हामंडळ (ईएसआयसी) बांदिल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
