भांगरभूंय | प्रतिनिधी
मडगांवां गोवा मुस्लीम फोरमा वतीन आतंकवादी हल्ल्याचो निशेध
मडगांव : पहलगामच्या आतंकवादी हल्ल्याचो निशेद करतां. आतंकवाद्यांक कसलोच धर्म लागना. खर बंदोबस्त आसतना हो हल्लो कसो जालो, हाची चवकशी जावपाची गरज आसा. इस्लाम धर्म कोणाचोच जीव घेवपाक शिकयना. जीव वाटावपाक शिकयता. काश्मिरी मुस्लिमांनी पर्यटकांक मजत करीत तें दाखोवन दिलें, अशें समाजीक कार्यकर्ते अझीम शेख हांणी सांगलें.
दक्षीण गोंय जिल्लोधिकारी कार्यालया लागसार गोवा मुस्लीम फोरम हे संघटणे वतीन पहलगामच्या दहशतवादी हल्ल्याचो निशेद केलो. ह्या वेळार अझीम शेख हांणी सांगलें, पहलगाम पर्यटना खातीर गेल्ल्या पर्यटकांचेर दहशतवादी हल्लो केलो. थंय मरण आयिल्ल्यांक आर्गां ओंपून ह्या हल्ल्याचो आमी निशेध करतात. आतंकाक धर्म नासता. खरो मुसलमान केन्नाच आतंकवादी जावपाक शकना. मुसलमान सगल्यांक वांगडा घेवन मुखार सरता. जांणी हल्लो केलो ते फकत नांवाचे मुसलमान आशिल्ले. इस्लाम कोणाकूच मारपाक शिकयना. जंय हो हल्लो जालो त्या भागांत जायत्या कश्मिरांतल्या लोकांनी जाय तितली मजत केल्या. काश्मिरांतल्या मुसलमानांनी जें मनीसपण दाखयलां तें इस्लाम धर्म शिकयता. हाका लागून ह्या विशयावेल्यान चुकीचो प्रचार करचो न्हय. हल्लो जालो थंय आतंकवादी शस्त्रांसयत कशे पावले हाली खोलायेन चवकशी जावपाक जाय. सोशल मिडियाचेर मुस्लिमां आड जी मोहीम सुरू जाल्या ती थारपाची गरज आसा. थारावीक राष्ट्रीय माध्यमां कडल्यान चुकीची म्हायती दिवपाचें काम जाता. चुकीचे म्हायतीच्या आदारार गैरसमज पातळावचो न्हय. देशांत सर्वधर्मीय सुखासमाधानान रावतात. ही शांतिकाय आनी एकवट सांबाळून दवरुया, अणेंय तांणी म्हणलें.
अशरफ पांडियाल हांणी सांगलें, इस्लाम कोणाचोच खून करपाक शिकयना. सगल्यांक एकवटान रावपाक शिकयता. भारत हो शांतीप्रिय देश. मात कांय जाण आतंकवाद पातळावपाचो यत्न करतात. हे घडणुकेचो निशेध करतां आनी अखंडता कायम उरची असो तांणी उलो मारलो.
हल्ल्याची खोलायेन चवकशी जावची : इफ्तिकार
पर्यटकांचेर आतंकवादी हल्लो करून पाकिस्तानान देशांतल्या विवीध धर्मां मदलो एकवट नश्ट करपाचो यत्न केला. भारतांत हिंदू, मुसलीम, क्रिस्तांव, शीख आनी हेर धर्मांचे विवीधतायेन एकवट आसा. हो एकवट उरचो न्हय अशें कांय जाणांक दिसता. ही सर्वधर्मीय अखंडताय केन्नाच नश्ट जावची ना. काश्मिरांत जें कितें जालें ताचो निशेध करतां. खर बंदोबस्त आसतनाय हो हल्लो कसो जालो हाची चवकशी केंद्र सरकारान करची, अशी मागणी संघटणेचे अध्यक्ष शेख इफ्तिकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
