भांगरभूंय | प्रतिनिधी
भोपाळ : इस्लामाचो तिट्टी तलाका कडेन कांयच संबंद ना, अशें प्रधानमंत्री नरेंद्र मोदी हांणी आयज मंगळारा भोपाळांत सांगलें. ताका तेंको दिवपी लोक मतां खातीर राजकारण करतात. दोन कायद्यांचेर घर चलूंक शकना. समान नागरी कायद्या विशीं लोकांच्या मनांनी जाल्लो गोंदळ भाजपा पयस करतली, अशें मोदी हांणी सांगलें.
बिहारांत जाल्ले विरोधी पक्षाचे बसकेचेरूय तांणी टिका केली. ह्या सगळ्या पक्षांच्या घोटाळ्यांचो आंकडो एकठांय केल्यार 20 लाख कोटीं वयर पावतलो, अशेंय मोदी हांणी सांगलें.
मध्य प्रदेश, राजस्थान आनी छत्तीसगढ वेंचणूक आनी 2024 वर्साचे लोकसभा वेंचणुके खातीर प्रधानमंत्र्यान प्रचार सुरू केलो. मोतीलाल नेहरू स्टेडियमांत ‘माय बूथ, स्ट्रॉन्गेस्ट’ ह्या मोहिमेक मध्य प्रदेशांतल्या 543 लोकसभा आनी 64,100 बूथांच्या 10 लाख वावुरप्यांक डिजिटल पद्दतीन संबोधन केलें. सगल्या राज्यांच्या विधानसभा मतदारसंघांतले तीन हजार कार्यकर्तेय हांगा हाजीर आशिल्ले. तशेंच प्रधानमंत्र्यान भोपाळांतल्या राणी कमलापती रेल्वे स्टेशना वयल्यान देशांत 5 नव्यो वंदे भारत गाडयो सुरू केल्यो.
मोदी हांणी ट्विट करून ‘ह्यो गाडयो मध्य प्रदेश, कर्नाटक, महाराष्ट्र, गोंय, बिहार आनी झारखंड हांचे मदलो संपर्क सुदारतल्यो’ अशें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
