इस्रोन तयार केलो दर्यापोंदा आशिल्ल्या राम सेतुचो पयलो नकासो

भांगरभूंय | प्रतिनिधी

नवी दिल्ली, खबरां संस्था ः इस्रोच्या शास्त्रज्ञांनी नासाच्या आयसीइसॅट-2 (ICESat-2) उपगिऱ्याच्या मजतीन दर्याच्या उदका पोंदा गेल्ल्या राम सेतुचो पयलो सर्वसमावेशक नकासो तयार केलां. राम सेतू ‘अॅडम्स ब्रिज’ ह्या नांवानय फामाद आसा. इस्रोच्या शास्त्रज्ञांनी राम सेतुचेर केल्लें संशोधन ‘सायंटिफिक रिपोर्ट्स’ ह्या नेमाळ्यांत उजवाडाक आयलां.
इस्रोच्या जोधपूर आनी हैदराबाद नॅशनल रिमोट सेन्सिंग सेंटरांतल्या शास्त्रज्ञांक ह्या सोद निबंदाचें श्रेय वता. तांणी ह्या संशोधनांत म्हणलें, ‘नासाचो उपगिरो आयसीइसॅट-2 वॉटर पेनेट्रेट फोटॉन वापरून अॅडम्स पुलाचो पयलो सविस्तर नकासो तयार केला. रामसेतूचो 99.98 टक्के वाठार सामको उथळ उदकांत बुडला. देखून ह्या पुलाचें सर्वेक्षण तारवा वरवीं वा प्रत्यक्षांत उदकांत देंवून करप शक्य नाशिल्ल्यान उपगिऱ्याची मजत घेतली. हो नकासो तयार करपाखातीर इस्रोच्या शास्त्रज्ञांनी आयसीइसॅट-2 उपगिऱ्याच्या प्रगत लेसर तंत्रगिन्यानाचो उपेग केलो. गिरिबाबू दंडबथुला हांणी ह्या प्रकल्पाचें फुडारपण केलें.
शास्त्रज्ञांनी 2018 (ऑक्टोबर) ते 2023 (ऑक्टोबर) मेरेनचो डेटा वापरून बुडिल्ल्या पुलाची पुराय लांबाय 10 मीटर रिझोल्यूशनाचो नकासो तयार केला. ह्या नकाशा प्रमाण 29 किमी. लांबायेच्या रामसेतुची उंचाय दर्याथरासावन 8 मीटर इतली आसा. अशें तरेचो हो नकासो आतां मेरेनचो सगळ्यांत व्हडलो नकासो जावन आसा.

इस्रोन तयार केलो दर्यापोंदा आशिल्ल्या राम सेतुचो पयलो नकासो

भारतांतल्या रामेश्वर जुंव्याचे दक्षीण- पूर्वे कडल्या धनुशकोडी सावन श्रीलंकेंतल्या मन्नार जुंव्याचे उत्तर- पश्चिम तोंका मेरेन तलायमन्नार मेरेन राम सेतुचो विस्तार आसा. हो प्राचीन पूल भारतांतल्या धनुशकोडीक श्रीलंकेंतल्या तलायमन्नार जुंव्या कडेन जोडटा. ह्या पुलाचो उल्लेख रामायणांत आयिल्ल्यान राम सेतुक संस्कृतीक म्हत्व आसा. रामाच्या वानर सेनेन लंके मेरेन पावपा खातीर ह्या पुलाचो वापर केल्लो. इ. स. च्या णव्या शेंकड्या मेरेन पर्शियन लोक ह्या पुलाक ‘सेतू बंधाई’ अशें म्हण्टाले. रामेश्वरमाच्या देवळाच्या नोंदी प्रमाण 1480 मेरेन हो पूल दर्या वयर कांय उंचायेचेर आशिल्लो पूण उपरांत आयिल्ल्या वादळाक लागून ताचे लुकसाण जाले आनी तो बुडलो.