भांगरभूंय | प्रतिनिधी
नवी दिल्ली, खबरां संस्था : पॅलेस्टायनची संघटणा हमास आनी इस्रायलांत सुरु आशिल्ल्या झुजाचे फाटभूंयेर भारत सरकारान ज्यू लोकां कडेन संबंदीत आशिल्ल्या राज्यांनी हाय अलर्ट जारी केला. फाटल्या सात दिसां सावन इस्रायल आनी हमास हांचे मदीं झूज पेटलां. आयज इस्रायलच्या सैन्यांनी गाजा पट्टीचो उत्तर भाग रिकामो करपा खातीर २४ वरांचो ‘अल्टिमेटम’ दिलो. उपरांत विवीध देशांतल्या पॅलेस्टायन समर्थक संघटणांनी हाचो निशेध केला. ताका लागून भारतांतल्या गोंय, दिल्ली, महाराष्ट्र आनी हिमाचल प्रदेश ह्या राज्यांनीय हाय अलर्ट जारी केला. तशेंच भारतांत आशिल्ल्या इस्रायली अधिकारी, पर्यटकांचे सुरक्षितताये खातीर राज्यांक केंद्रान निर्देश दिल्यात.
मजगतीं, ह्या इस्रायल आनी हमासच्या झुजांत भारतान इस्रायलाक तेंको दिला. पूण भारतांतल्या कांय संघटनांत पॅलेस्टायनाक समर्थन दिवन हमासाक फाटबळ दिलां. ताका लागून भारतांतल्या यहुदींचेर संकश्टां कोसळपाची शक्यताय न्हयकारू येना. अशी म्हायती गुप्तचरां कडल्यान आयिल्ल्यान भारत सरकारान जंय ज्यूचीं प्रार्थना स्थळां, लोक वसणूक आसा थंय हायअलर्ट जारी केला. हातूंत दिल्ली, मुंबयचें ‘चावडा हावज’ हांचो आसपाव आसा. आयज सकाळ सावन गोंय, दिल्ली, महाराष्ट्र आनी हिमाचल प्रदेश ह्या राज्यांनी हाय अलर्ट जारी केला. तशेंच दिल्लीच्या जामा मशिदी सयत हांगच्या हेर वाठारांनी खर सुरक्षा वेवस्था दवरल्या. जाल्यार देशभरांत आशिल्ल्या इस्रायली अधिकारी, पर्यटकांची सुरक्षितताय वाडयल्या.
सध्या गोंयांत सुमार २५ इस्रायली पर्यटक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
