भांगरभूंय | प्रतिनिधी
नवी दिल्ली, खबरां संस्था : भारत आनी मालदीव हांचे मदीं तणाव निर्माण जातकच फाटीं लक्षद्वीपाचेर खूब भासाभास जाल्ली. मात आतां मालदीव आनी इस्रायल हांचे मदल्या तणावांत भारताचें लक्षद्वीप ट्रेंड जावपाक लागलां. सोशल मिडियाचेर इस्रायलान मालदीवाचेर बहिश्कार मोहीम सुरू केल्या. मालदीवा परस भारत चड सोबीत अशें सांगून इस्रायल भारतांतल्या वेगवेगळ्या पर्यटन थळां विशीं म्हायती दिता. कांय म्हयन्यां आदीं प्रधानमंत्री नरेंद्र मोदी हांणी लक्षद्वीपाक भेट दिली. त्या वेळार लक्षद्वीपाचे फोटो शेअर करून लोकांनी पर्यटनाक येवपाचो उलो मारलो. तेन्ना हजारांनी लोक थंय वचपाक लागले.
मालदीव सरकारांतल्या दोन मंत्र्यांनी प्रधानमंत्री नरेंद्र मोदीचेर टिका केल्ली. ते उपरांत भारतीयांनी मालदीव बहिश्कार मोहीम सुरू केली. सध्या मालदीवाक खर धपको बसला. आतां इस्रायलान भारताच्या पावलार पावल दवरलां.
विशय कितें?
इस्रायलाच्या पासपोर्ट धारकांक मालदीवांत प्रवेश करपाचेर बंदी घालपाचो निर्णय मालदीवचो राष्ट्रपती मोहम्मद मुइज्जू हांणी घेतला. ते उपरांत भारतांतल्या इस्रायलाच्या राजदूतान आपल्या नागरिकांक भारतांत वचपाचो सल्लो दिला. भारतांत इस्रायल पर्यटकांक येवकार आसा अशें दूतावासान सांगलें. गोंय, अंदमान आनी निकोबार जुंवे, लक्षद्वीप आनी केरळ ह्यो दर्यादेगो तांचे खातीर बरीं पर्यटन थळां आसात. इस्रायलाच्या नागरिकांनी भारतांतल्या ह्या पर्यटन थळांक भेट दिवची असो सल्लो इस्रायलाच्या राष्ट्रपतीन दिलो.
भारतांतल्यो दर्यादेगो सोबीत आसात
इस्रायलाच्या राष्ट्रपतीन सोशल मिडिया प्लॅटफॉर्म एक्सचेर एक पोस्ट शेअर केला. ह्या पोस्टांत तांणी लक्षद्वीप, अंदमान आनी निकोबार जुंवे, गोंय आनी केरळांतल्या दर्यादेगांचे फोटो घातल्यात. इस्रायलाच्या राष्ट्रपतीन ह्या पोस्टांत म्हणलां, मालदीव आतां इस्रायलाक येवकार दिना. पूण भारतांत इस्रायल पर्यटकांक येवकार दिवपी कांय सोबीत आनी सुंदर दर्यादेगो आसात.
सोशल मिडियाचेर बहिश्कार
एक्साचेर मिहा श्वार्टजनबर्ग हांणी, ‘मालदीव आतंकवाद्यांक मजत करता’ अशें बरयलां. इस्रायलाच्या पासपोर्टाचेरूय बंदी आसा. हाका लागून इस्रायलाक कसलेच त्रास जावचे ना. आतां मालदीवाचेर बहिश्कार घालपाचो वेळ आयला. एक ब्रिटीश- इस्रायली म्हणून हांव केन्नाच मालदीवांत वयचो नासलों. भारतांतल्यो दर्यादेगो चड सोबीत आसात, अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
