भांगरभूंय | प्रतिनिधी
तेल अविव, खबरां संस्था : इस्रायल आनी हमास हांचे मदल्या झुजाक शेनवारा (14 आॅक्टोबर) आठ दीस जाले. हमासान शेनवारा 7 ऑक्टोबराक इस्रायलाचेर अचकीत रॉकेट हल्ले केल्ले. उपरांत इस्रायलय आक्रमक जालो. काल शुक्रारा इस्रायलान नागरिकांक 24 वरां भितर गाझा सोडपाचो आदेश दिला. अशे तरेन इस्रायलाचे प्रधानमंत्री बेंजामिन नेतन्याहून हमासाक थेट शिटकावणी दिल्या. बेंजामिन नेतन्याहून सूड घेवपाची सुरवात आतांच जाल्या, अशें सांगलां.
“दुस्मानान ताचें मोल फारीक करपाक सुरवात केल्या. फुडें कितें जातलें, सांगपाक जायना. पूण, ही फकत सुरवात. ज्यू नागरिकांचेर घाल्लें झुज आमी केन्नाच मान्य करचे नात. आमी आमची सगळी तांक वापरून दुस्माना कडेन झुजतले अशें बेंजामिन नेतन्याहू हांणी सांगलें.
मजगतीं, पॅलिस्टिनी आनी कांय इस्रायली लोक रावतात, ते गाझा पट्टींत इस्रायलाचेर हल्ले चालूच आसात. आतां मेरेन दोनूय वटेन मेळून तीन हजारां वयर लोक मेल्यात. इस्रायलान गाझांतल्या इस्रायली लोकांक सुरक्षीत जाग्यांचेर व्हरपाक सुरवात केल्या. हाचो अर्थ आतां जमनी वयल्यान हल्लो करपाची तयारी इस्रायलान सुरू केल्या. तशें केल्यार खूब लोकांक मरण येतलें, अशें जाणकारांक दिसता.
पुतीनाची शिटकावणी
इस्रायलाच्या लश्करी सैन्यान शुक्रारा रातीं सांगलें की, आमचें सैन्य हमासाचेर जमनी वयली मोहीम सुरू करपाक तयार आसा. पूण, “इस्रायलाच्या जमनी वयल्या मोहिमेक लागून जायत्या नागरिकांक मरण येतलें. जें आमकां मान्य ना अशें पुतीनान इस्रायलाक सांगलें.
“इस्रायलाचेर अचकीत हल्लो जालो. इस्रायलाक आपली राखण करपाचो पुराय अधिकार आसा. पूण, रक्तपात आतां थांबपाक जाय. इस्रायलान गाझाचेर जमनी वयल्यान हल्लो केल्यार ताचे गंभीर परिणाम जातले. नागरिकांचें मरण आमकां मान्य ना. मुखेल गजाल म्हळ्यार रक्ताचो थेंब पसून पडपाक जायना. रशिया सगळ्यां कडेन चर्चा करपाक तयार आसा अशें व्लादिमीर पुतीनान आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
