भांगरभूंय | प्रतिनिधी
पुणे, खबरां संस्था: पुण्याक कोयतो गँगची चर्चा चालूच आसता. पुणे पुलिसांनी हांगा कोयतो विकपाक खर नेम घाल्यात. नेम घालून लेगीत दोग नेण्ट्या चल्यांनी एका णववेक शिकपी चल्याचो कोयत्यान खून केलो. खुनाचे कारण अजाप करपा सारकें आसा. त्या दोगांयची एकूच इश्टीण आशिल्ली. मात ती उलयनाशिल्ल्यान हो खून केलो. ह्या प्रकरणांत दोगूय नेण्ट्या आरोपींक पुणें पुलिसांनी कांय वरांनीच अटक केली. मजगतीं, १५ वर्सां पिरायेच्या भुरग्यांक कोयतो असो सहज मेळिल्ल्यान पुणेकारांनी हुस्को उक्तायला.
पुण्या शारांत सिंहगड वाठारांत आनंदवन सोसायटी आसा. हे सोसायटींत प्रकाश हरिसिंग राजपूत (१५) आपल्या कुटुंबा सयत रावतालो. तो खानापूर हांगच्या महात्मा गांधी विद्यालयांत णववेंत शिकतालो. ताची आवय सोसायटींत काम करता. हरिसिंग राजपूत शाळेंतल्यान आयले उपरांत जेवन न्हिदलो. तो न्हिदिल्ले कडेन दोग नेण्ट्या चल्यांनी येवन ताचे तकलेर कोयत्यान वार केलो. राजपूत हाणे घरांतल्यान धांव मारली. मात शंभर फुटांचेरूच तो कोसळ्ळो.
आरोप्यांनी खून कित्याक केलो?
प्रकाश आनी हल्लो करप्यांची एक इश्टीण आशिल्ली. हल्लो करप्यां मदल्या एकल्या चल्या कडेन ती चली कांय दिसां सावन उलयनाशिल्ली. प्रकाशाच्या सांगण्या वयल्यान ती चली उलयना अशें आरोप्यांक दिसलें. ताका लागून आरोप्यांनी प्रकाशाकूच मारून उडोवपाचें थारायलें. ते प्रमाण तांणी प्रकाशाचो कोयत्यान खून केलो. आरोपींक पुलिसांनी अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
