भांगरभूंय | प्रतिनिधी
बागा-कळंगूटे हैदराबादचो पर्यटक बुडलो
म्हापशें: बागा-कळंगूटे दर्यादेगेर बुडपी इश्टाक वाटावपा खातीर गेल्लो परवेझ शेख (24, रा. हैद्राबाद) हो तरणाटो पर्यटक बुडलो. जाल्यार मोहम्मद इब्राहीम (24, रा. हैद्राबाद) हाका जीवरक्षकांनी वाटायलो.
ही घडणूक काल (सोमारा) सांजवेळा बागा-कळंगूटे हांगासरल्या टीटोस लेन वाठारांतल्या दर्यादेगेर घडली. बेपत्ता परवेझ शेख हो आपल्या पांच इश्टां सयत सोमाराच गोंयांत पर्यटना खातीर आयिल्लो. बागा-कळंगूटे दर्यादेगेर घडणूक थळार सांजवेळा हो पंगड आयिल्लो तेन्ना मोहम्मद इब्राहीम हो उदकांत न्हावपा खातीर देंवलो. कांय वेळान तो दर्यांत बुचकळ्यो खायत आशिल्ल्याचें नदरेक पडटकच परवेझान उदकांत इश्टाक वाटावपा खातीर उडी मारली.
हेर इश्टांनी आड्डी मारतकच जीवरक्षकांक घडणुकेची कल्पना दिली. तेचबराबर दृश्टी मरिनाच्या जीवरक्षकांनी लेगीत उदकांत धांव घेतली आनी इब्राहीम हाका वाटायलो. पूण परवेझ हो दर्याच्या उदकांत गायब जालो. जीवरक्षकांनी ताचो सोद घेवपाचो यत्न केलो पूण तो सांपडूंक शकलो ना.
घडणुकेची खबर मेळटकच कळंगूट पुलीस, पर्यटक पुलीस आनी दर्यादेगे वेल्या पुलिसांनी घडणूक थळार धांव घेतली. दर्यादेग पुलिसांनी आनी जीवरक्षकांनी रातीं उसरां मेरेन बेपत्ता तरणाट्याचो उदकांत सोद घेतलो पूण तो सांपडलो ना. फुडलो तपास पुलीस करतात.
मजगतीं, हैद्राबादचो तरणाट्यांचो पर्यटक पंगड गोंयांत बसीन आयिल्लो. तांची प्रवासी बस वाटेरूच बंद पडली. उपरांत ह्या पंगडान भाड्याची टॅक्सी केली आनी ते सोमाराच गोंयांत पाविल्ले. सदर टॅक्सीचें भाडें लेगीत बेपत्ता परवेझ शेख हाणें स्वताच्याच बोल्सांतल्यान दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
