भांगरभूंय | प्रतिनिधी
सेगीत दोन मॅची हारून पयलींच माळ वगडावपी टीम इंडियान तिसरे मॅचींत येजमान बांगलादेशाक 227 धांवड्यांनी हारयलो. हें जैत जोडून भारतान माळेंत धूप जावपा पसून स्वताक वाटायलो. वन डे क्रिकेटींत धांवड्यांच्या फरकान भारतान बांगलादेशा आड मेळयिल्लें हें व्हड जैत थारलें. 2003त ढाकांत जाल्ले मॅचींत ताणें बांगलादेशाक 200 धांवड्यांनी हारयिल्लो.
ओपनर इशान किशानाच्या 210 आनी विराट कोहलीच्या 113 धांवड्यां नेटार भारतान 409 धांवड्यांचो दोंगर उबारलो. जैता खातीर 410 धांवड्यांची मोख घेवन मैदानांत देंवपी बांगलादेशाचो डाव 182चेर सोंपलो. शार्दुल ठाकूरान तीन, अक्षर पटेल, उमरान मलिक हांणी दरेकी 2 विकेटी घेतल्यो. बांगलादेशा वतीन शाकिब अल हसनान सगल्यांत चड 43 धांवड्यो केल्यो.
भारतान दिल्ले 410 धांवड्यांचो फाटलाव करतना बांगलादेशान आक्रमक सुरवात केली. पूण, अक्षर पटेल आनी मोहम्मद सिराज हांणी ओपनरांक तंबूंत धाडून बांगलादेशाचेर चेपण तयार केलें. अक्षर पटेलान अनमूल हकाक 8 आनी मोहम्मद सिराजान लिटन दासाक 29 धांवड्यांचेर बाद केलो.
ते उपरांत बांगलादेशाचो अणभवी बॅट्समन शाकिब अल हसनान भागिदारी करपाचो यत्न केलो. पूण, मुशफिकूर रहीम 2 आनी यासिर 25 धांवड्यो करून ताची साथ सोडली. अखेर कुलदीप यादवान शाकिबाची खेळी 43 धांवड्यांचेर सोंपयली. शाकिब बाद जाल्या उपरांत आयिल्ल्या बॅट्समनांक खास कांय करपाक जमलें ना. अखेरेक भारतान बांगलादेशाचो डाव 182चेर सोंपोवन वट्ट 227 धांवड्यांनी जैत जोडलें.
ते पयलीं बांगलादेशान टॉस जिखून भारताक पयलीं बॅटींग करपाचें आमंत्रण दिलें. इशान किशन (210) हाचो दोट्टी शेंकडो आनी विराट कोहलीचो (113) शेंकडो हाच्या नेटार भारतान 50 ओव्हरींनी 8 विकेटी वगडावन 409 धांवड्यो केल्यो.
किशन आनी कोहली हांणी दुसरे विकेटी खातीर 305 धांवड्यांची भागिदारी केल्या उपरांत भारताची मदली फळी गडगडली. लोकेश राहुल 8 आनी श्रेयस अय्यर 3 धांवड्यो करून बाद जाले. ते उपरांत अक्षर पटेल आनी वॉशिंग्टन सुंदर हांणी सवे विकेटी खातीर 46 धांवड्यांची भागिदारी करून भारताक 390च्या वयर पावयलो. अक्षर 20 धांवड्यो करून बाद जाल्या उपरांत वॉशिंग्टन सुंदरान 27 बॉलांनी 37 धांवड्यो करून भारताक 400 पांवडो हुपून दिलो.
—————
इशान किशानाचो विक्रम
भारताचो सदचो मुखेली रोहित शर्मा जखमी जाल्ल्यान तो तिसरे मॅचींत खेळूंक नाशिल्लो.ताचे सुवातेर इशान किशनाक निमाण्या इकरांत सुवात दिल्ली. ताणें मेळिल्ले संदीचो योग्य फायदो करून घेतना जलद दोट्टी शेंकडो मारून संवसारीक विक्रम आपल्या नांवार केलो. ताणें फक्त 126 बॉलांनी हो विक्रम केलो.
ताणें वॅस्ट इंडिजाचो म्हान बॅट्समन क्रिस गेलाचो विक्रम मोडलो. गेलान 2015त झिम्बाब्वे आड खेळटना 138 बॉलांनी दोट्टी शेंकडो नोंदयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
