भांगरभूंय | प्रतिनिधी
इंदर भल्लाः वास्कोच्या ज्येश्ठ नागरिकांचो सत्कार
भांगरभूंय । प्रतिनिधी
वास्कोः ज्येश्ठ नागरिकांनी निवृत्ती उपरांत सगळी जमापुंजी भुरग्यां खातीर खर्च करिनासतना आपल्या फुडारा खातिरूय इल्ली जोड सांबालून दवरपाची गरज आसा. गोंय सरकारान ज्येश्ठ नागरिकांच्या संवेदनाची दखल घेवपाची गरज आसा. तशेंच ज्येश्ठ नागरिकांक हेर कांय राज्यां वरीं निदान पांच हजार रुपया पेन्शन मेळपाची गरज आसा. कोरोना म्हामारी काळांत बंद केल्ली रेल्वे प्रवास सवलत परतून चालू करपाची गरज आसा, अशें अखील ज्येश्ठ नागरीक म्हासंघाचे आदले अध्यक्ष इंदर मोहन भल्ला हांणी शेनवारा वास्को एके कार्यावळींत उलयतना सांगलें.
मुरगांव म्हाल ज्येश्ठ नागरीक संघटणेन रवीन्द्र भवन बायणाच्या पालवान मुरगांव म्हालांतल्या ज्येश्ठ नागरिकांचो सत्कार सुवाळो आयोजीत केल्लो. ह्या वेळार मुखेल सोयरे म्हूण भल्ला उलयताले. ह्या वेळार माचयेर रवीन्द्र भवनाचे अध्यक्ष जयंत जाधव, नगरसेविका शमी साळकार, मुखेल उलोवपी अॅड. शैलेश कुलकर्णी, संघटणएचे अध्यक्ष अनील चोडणकार, सरचिटणीस बी. एस. इंगल्लल्ही, भांडारी दयानंद राणे हाजीर आशिल्ले.
ह्या सुवाळ्यांत आनंद सातोस्कार, डॉ. नामदेव चोपडेकार, पद्मनाभ आमोणकार, आनंद नायक, क्लारॅन्स फुर्तादो, अनंत नायक, दामोदर रमाकांत नायक (सांकवाळ), नंदा होन्नावरकर, शेख अब्दुल मजीद हांचो सत्कार केलो.
देखभाल कायदो 2007 ची खरसाणीन अंमलजावणी जावपाची तशेंच ज्येश्ठां विशींच्या कांय कायद्यांनी दुरुस्ती करपाची गरज भल्ला हांणी उक्तायली. गोंयांत जे ज्येश्ठ नागरीक एकसुरें जिवीत जियेतात, तांचे विशींची पुलिसां कडेन सगळी म्हायती आसप गरजेचें आसा. जे वरवीं त्या ज्येश्ठ नागरिकांक वेळार मजत मेळपाक शकतली. प्रधानमंत्री नरेंद्र मोदी हांणी सुरू केल्ल्या आयुष्यमान भारत येवजणेचो संबंदीत ज्येश्ठ नागरिकांक लाव मेळचो, हे खातीर यत्न जावपाक जाय. हे खातीर लोकप्रतिनिधी तशेंच पंचांनी आपल्या प्रभागांतल्या अश्या ज्येश्ठ नागरिकांचो सोद घेवन तांची नोंदणी करपाक जाय. ज्येश्ठ नागरिकां खातीर डे कॅर केंद्राची गरज आसा. ते खातीर गोंय सरकारान फुडाकार घेवचो, असो तांणी उलो मारलो.
मरणपत्र आनी कंडिशनल गिफ्ट डीड हे संबंदांत अॅड. शैलेश कुलकर्णी हांणी मोलाची म्हायती दिली. गिफ्ट डीड करचे परस मरणपत्र करप बरें. गोंयांत मरणपत्र ऑनलायन वा ऑफलायन करपाक मेळटा. मरणपत्र केलें ना जाल्यार संबंदीत व्यक्तीक मरण आयले उपरांत घरच्यांक धांवपळ करची पडटा, ते भायर अर्थीक मार बसता, अशी म्हायती दितना तांणी कांय देखी दिल्यो. हाजीर आशिल्ल्या कांय जाणांनी विचारिल्ल्या प्रस्नांक तांणी फावोश्यो जापो दिल्यो.
अॅड. कुलकर्णी हांची म्हायतीयुक्त कार्यावळ आयोजीत केल्ले खातीर हाजीर आशिल्ल्यांनी आयोजकांचे कवतूक केलें.
जयंत जाधव हांणी ज्येश्ठ नागरीक संघटणेक सगळे तरेची मजत करपाचें आस्वासन दिलें. तांणी रवीन्द्र भवन ज्येश्ठ नागरिकां खातीर कसले उपक्रम हातांत घेता, ताची म्हायती दिली. अनील चोडणकार हांणी येवकार दिलो. दयानंद राणे हांणी सत्कारमुर्तींची वळख वाचली. श्याम च्यारी हांणी सुत्रसंचालन केलें, जाल्यार इंगल्लल्ही हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
