भांगरभूंय | प्रतिनिधी
गोंयांत 1994- 95 च्या सुमाराक पेजर आयिल्लें. पॅण्टीक भायर पावच लावन भितर मोबायल फोन दवरतात, तसोच पेजर दवरताले. ताचेर मॅसेज येतकच मागीर कार्यालयांत येवप वा भायल्यान फोन करप. संपर्का खातीर संदेश धाडपाचें तें उपकरण. लेबनॉनांत मंगळारा पेजर, वॉकीटॉकी, सॅटलायट फोनांचो स्फोट जावन 32 जाणांक मरण आयलां. तर साडेचारशें लोक गंभीर जखमी जाल्यात. पेजर बोल्सांत फुटून जखमी जातानाचो एक व्हिडियोय व्हायरल जाता. हेजबोला हे संघटणेच्या तीन हजार वांगड्यांक बुद्द शिकोवपाक हो हल्लो इझ्रायलान केला, अशें राजकी जाणकारांचें म्हणणें. मोसाद न्हय, तर युनीट- 8200 हे इझ्रायलाचे गुप्तचर संघटणेन हो हल्लो केला, असोय तांचो दावो. तर हो हल्लो आमी करूंक ना, अशें इझ्रायलान स्पश्ट केलां. आतां नवे तरेच्या झुजाच्या पांवड्याचेर आमी उबे आसात. ते खातीर तयारूय आसात, अशें तांच्या संरक्षण मंत्र्यान म्हणलां. हेजबोलाक हे पेजर दिवचे पयलीं तातूंत धाकटुलें स्फोटक उपकरण बसयलां आनी आतां रेडियो सिग्नलां वरवीं एकाच वेळार स्फोट घडोवन हाडल्यात, अशेंय कांय तज्ञांक दिसता. पूण एकूणच हें प्रकरण गूढ जायत चल्लां.
हिजबोला हे कडवे संघटणेचो पॅलेस्टायनाच्या हमासाक जाहीर तेंको आसा. इझ्रायलाचेर क्षेपणास्त्र हल्लो जालो, ताचे फाटल्यान हिजबोला आसूं येता. उपरांत तांणी इझ्रायला आड जाहीर भुमिका घेवन तांचेर स्वता हल्लो केल्लो. ताका इझ्रायलान रोखठोक जापूय दिल्ली. म्हणटकच पेजर हल्ल्या फाटल्यान खरेंच इझ्रायल ना जाल्यार तें अजाप म्हणचें पडटलें. मोसाद हे इझ्रायलाचे गुप्तचर संघटणेनूच पेजरांत स्फोटक उपकरण बसयलां, असो दावो लेबनॉनाच्या सुरक्षा सुत्रांनी केला. हे 5000 पेजर तैवानांत तयार जाल्यात. कंपनी गोल्ड अपोलो. जानेवारींत ते हेजबोलान आयात केल्ले. त्या वेळार मदीं खंय तरी इझ्रायलान हस्तक्षेप करून दरेका पेजरांत ते बसयल्यात अशें ह्या सुत्रांचें म्हणणें.
पेजर हें उपकरण कावलाक वचून 25 वर्सां जावन गेलीं. तरीय हिजबोला तें कित्याक वापरता? आपल्यो कारवायो, ते विशींचें उलोवप गुपीत उरचें हें ताचे फाटलें कारण. वॉकीटॉकी, सॅटलायट फोन हाचे फाटल्यानूय तोच उद्देश आसा. आतंकवादी कारवायो करपाक कडव्या विचारांच्यो सगल्योच संघटणा असले पराक्रम करतात काय? कारण हें यूग स्मार्ट फोनाचें…. आनी कांय लोक मुखार वचपाचें सोडून फाटीं – फाटीं येवपाक लागल्यात! पेजरा वांगडाच वॉकीटॉकींचोय स्फोट जाला. जपानाच्या आयकॉम कंपनीन त्यो तयार केल्यात. मात, कंपनीन ह्या मॉडेलाचें उत्पादन 2014 त बंद केल्ल्याचें जाहीर केलां. हे संबंदी आमी स्वता तपास सुरू केला, अशेंय कंपनीच्या अधिकाऱ्यांचें म्हणणें.
हेजबोलान चडशे पेजर तस्करी करून लेबनॉनांत हाडिल्ल्याचीय म्हायती उक्तडार आयल्या. तातूंत लिथीयमाची बॅटरी मेळ्ळ्या. खर उश्णतायेंत ही बॅटरी सामकी सुरक्षीत. ताकाच लागून चडशे उत्पादक तीच वापरतात. भोवतेक सगल्या आधुनीक उपकरणांनी लिथीयमाचीच बॅटरी आसता. अमेरिकन शास्त्रज्ञांच्या मतान, बॅटरी चड प्रमाणांत चार्ज जायत जाल्यार फुटपाक शकता. तशें लेबनॉनांचें हवामानूय उश्ण. मात एकाच वेळार सगल्यांच्योच बॅटरी चड प्रमाणांत चार्ज जावप हें शक्य ना. मागीर पेजरांत स्फोट जाय सारकें कितें घडलें? काय हिजबोलाक तांची पुरवण करतना कोणे तरी तातूंत स्फोट जावपी उपकरण बसयिल्लें? कांय जाणांक तो इलेक्ट्रॉनीक झुजाचो प्रकार दिसता. खुद्द इझ्रायलान नवे तरेच्या झुजाच्या हुंबऱ्यार आमी उबे आसात, अशें म्हणलां. कोरोनाची धाम पातळिल्ली तेन्नाय चीनान तो हवेंत सोडला, झुजाचोच तो एक प्रकार अशें जायत्या जाणांनी म्हणिल्लें. विखारी हवा सोडपाचेय प्रकार घडल्यात. रसायनाचो झुजांत वापर जायना अशें आयज कोणूच ठामपणान सांगपाक शकना. म्हणटकच हिंसाचाराच्या प्रकारांची कसलीच शक्यताय भायर उडोवपाक मेळचीं ना.
इझ्रायलान आपले शिमेर दोग सैनीक मेल्ल्याचें जाहीर केलां. तांणी लेबनॉनाचेर तांकां मारिल्ल्याचो आरोप केला. वातीन वात पेटत वच्ची तशे आतां तांचे मदीं वाद वाडत आसा. पेजर स्फोटांक लागून मरप्यांचो आंकडो वाडल्यार (कारण साडेचारश्यां वयर गंभीर जखमी जाल्यात.) दोनूय देशां मदली कोडसाण वाडटली आनी मागीर झुजाची कीट पेट्टली. हमास, हिजबोला हांकां इस्रायलाचेर हल्लो करपाची खुमखुमी आसाच. ताचें फळ पुराय संवसाराक भोगचें पडूं येता. कारण अरब राष्ट्रां हीं इंधनान गिरेस्त. पुराय संवसाराक तीं इंधन, सुको मेवो, केशर बी निर्गत करतात. भारता सयत सगल्या देशांचो म्हाल थंय वता. दोनूय वटेन लुकसाण जातलें, हें दुबाव विरयत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
