भांगरभूंय | प्रतिनिधी
संभाजीनगर, खबरां संस्था ः जायतीं जाणां इलेक्ट्रीक उपकरणांचो चड उपेग करपाक लागला. पूण जेन्ना आमी ती वापरतात, चार्जिंग करतात तेन्ना ताची योग्य ती जतनाय घेवप गरजेचें. महाराष्ट्रांत एक अशीच भयानक उज्याची घडणूक घडली. संभाजीनगरांत एक इमारत आसा. तिच्या तळमजल्यार कपडे आनी टेलराचे दुकान आसा. ह्या दुकानांत इलेक्ट्रीक वाहनाची बॅटरी चार्जिंगांक लायिल्ली. कांय वेळान तिचो स्फोट जालो. हांतूत ७ जाणांक लासून मरण आयलें.
चड म्हायती प्रमाण, घराच्या कुशीक आशिल्ल्या कपड्याच्या दुकानांत इलेक्ट्रीक एक्टिवा बॅटरी चार्ज करपाक लावन कुटुंब न्हिदिल्लें. बॅटरी चड काळ चार्जिंगांक उरिल्ल्यान व्हड स्फोट जालो. ह्या स्फोटांत कुटुंबांतल्या 7 जाणांक लासून मरण आयलें. भुरगीं, जाण्टी, बायलो सयत पुराय कुटुंब न्हिदिल्लें आसतना अचकीत व्हडलो स्फोट जालो आनी घरांत व्हडलो उजो लागलो. ह्या उज्यांत कुटुंबातले 7 वांगडी लासून मेलें. ते मजती खातीर आड्डले पूण कोणाकूच भितर मजत करपाक वचूंक मेळ्ळें ना.
मरण आयिल्ल्यां मदीं नेण्टे असीम वसीम शेख आनी परी वसीम शेख हांचे वांगडा वसीम शेख (30), तनवीर वसीम (23), हमीदा बेगम (50), शेख सोहेल (35), रेश्मा शेख (22) हांचो आस्पाव आसा. हे घडणुकेंत 2 जाण पुरायपणान लासले. जाल्यार स्वास घुस्मटिल्ल्यान 5 जाणांक मरण आयलें. सातूय कुडीं लासिल्ल्या अवस्थेंत मेळ्ळ्यो.
स्फोटाचो आवाज आयकून शेजारी धांवून आयले आनी उजो पालोवपाचो यत्न केलो. तशेंच लोकांनी उजो पालोवपी दळाक फोन कोलो आनी पुलिसांक आपयले. उजो पालोवपी दळान घडणूक सुवातेर येवन उजो पालयलो. पूण ते मेरेन 7 जाणांक मरण आयिल्लें. तशेंच घरांतल्यो सगळ्यो वस्तू, पुराय सामान उज्यात लासले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
