भांगरभूंय | प्रतिनिधी
निती आयोगाच्या अहवालांतली म्हायती
भांगरभूंय । पिनाक कल्लोळी
पणजी : पोरूंचे तुळेंत अंदूं गोंयांत इलेक्ट्रीक गाडयो (ईव्ही) नोंदणी मात्शी उणी जाल्या. अशें आसलें तरीय पुराय देशाचो विचार केलो जाल्यार ईव्ही गाडयो घेवपांत गोंयकार मुखार आसात. निती आयोगान हालींच जारी केल्ल्या ‘राष्ट्रीय इलेक्ट्रीक मोबिलिटी निर्देशांक 2024’ ह्या अहवालांतल्यान ही म्हायती मेळ्ळ्या. अहवाला प्रमाण गोंया सयत महाराष्ट्र, कर्नाटक आनी केरळांत लेगीत खाजगी वापरा खातीर ईव्ही खरेदी करपाचें प्रमाण बरें आसा.
अहवाला प्रमाण, आयोगान 2024 त सगल्या राज्यांनी वट्ट खाजगी गाडी नोंदणी आन तातूंतलीं ईव्ही गाडी नोंदणीची तुळा केल्ली. ते खातीर केंद्र आनी राज्य सरकारा कडल्यान म्हायती एकठांय केल्ली. ह्या निर्देशांकांत गोंयान 100 गूण मेळोवन अचिव्हर ही श्रेणी मेळयली. ई-मोबिलिटी वयलो गिरायकांचो विस्वास, व्यापक जागरुकता, बरी राज्य पांवड्यार उर्बा हाका लागून गोंया सयत वयल्या तिनूय राज्यांत ईव्ही अदीक प्रमाणांत आपणायल्यात.
ते परांत ओडिशा, तेलंगणा, तामीळनाडू ह्या राज्यांनी वळीन 97, 97 आनी 83 गूण मेळयले. ईशान्ये कडल्या राज्यांनी हें प्रमाण सामकेंच उणें आशिल्लें. केंद्रशासीत प्रदेशांत चंडीगड (91 गूण), दिल्ली (71 गूण) आघाडेर आशिल्ली. ह्या निर्देशांकांत ईव्ही स्विकारपाचें प्रमाण, चार्जिंगे खातीर उपलब्ध मुळाव्यो सुविधा आनी ईव्ही मळा वयलें तंत्रज्ञान तशेंच नाविन्यपूर्ण संशोधन ह्या तीन निकशांचेर वट्ट गूण दिल्यात. ह्या तिनूय निकशांत मेळून गोंय 43 गूण घेवन देशांत 11 वे सुवातेर पावलो.
भौशीक ईव्ही चार्जराचें प्रमाण उणें
गोंयांत ईव्ही गाडयांचे तुळेंत भौशीक ईव्ही चार्जराचें प्रमाण उणें आसा. हे वळेरेंत गोंय 29 गुणां सयत देशांत 15 वे सुवातेर आशिल्लें. ईव्ही मळा वयल्या स्टार्ट अप आन संशोधन, वेवसायीक ईव्ही गाडयो स्विकारप ह्या निकशां मदीं लेगीत गोंयाक उणे गूण मेळ्ळे. राज्य सरकारान ईव्ही खातीर केल्लीं धोरणां, उपक्रम हे बाबतींत गोंय देशांत पांचवे सुवातेर आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
