भांगरभूंय | प्रतिनिधी
रस्तो येरादारी आनी म्हामार्ग मंत्रालयान इलॅक्ट्रीक वाहनाची (ईव्ही) बॅटरी वळखुपाक आनी तांच्या ट्रॅकिंगा खातीर एक नवी पद्दत तयार केल्या. आतां देशांतल्या दरेका ईव्ही बॅटरेचो आपलो खाशेलो वळख नंबर आसतलो, ताका ‘बॅटरी पॅक आधार नंबर’ (बीपीएन) अशें म्हण्टले, असो प्रस्ताव सरकारान मांडला.
हो आंकडो २१ अंकांचो आसतलो. हाका लागून बॅटरी तयार करपा सावन ती एक क्लिकाचेर इबाडपा मेरेन वा रिसायकल करपा मेरेनची पुराय म्हायती मेळटली.
बॅटरीचेर २१ अंकांचो युनीक नंबर सक्तीचो
मंत्रालयान जारी केल्ल्या मार्गदर्शक तत्वांच्या मसुद्या प्रमाण बॅटरी तयार करपी कंपनींनी आनी आयात करप्यांक दरेका बॅटरी पॅका फाटल्यान २१ अक्षरांचो बीपीएन दिवप सक्तीचें आसतलें. हो नेम फकत बाजारांत विकपी बॅटरीं खातीरूच लागू जावचोना, जाल्यार कंपनींनी स्वताच्या वापरा खातीर तयार केल्ल्या बॅटरींकय लागू जातलो.
नंबर मिटोवंक मेळचोना अशे सुवातेर तो दसयतले
मार्गदर्शक तत्वां प्रमाण बीपीएन बॅटरी पॅकाचेर सहजपणान दिसपी सुवातेर हो नंबर दसोवन दवरचो.क्रमांकाची सुवात अशी आसप गरजेचें जंय हो नंबर पेड्यार जावचोना वा काडपाक मेळचो ना हाची खात्री कंपनींक करची पडटली.
ते भायर कंपनींक बॅटरीचो रियल टायम डेटा बीपीएनच्या अधिकृत पोर्टलाचेर अपलोड करचो पडटलो.रिसायकल केल्या उपरांत नवो बीपीएन नंबर मेळटलो.
हे पद्दतीचें सगळ्यांत व्हडलें खाशेलपण म्हळ्यार बॅटरीच्या पुराय लायफ सर्कलाचेर नियंत्रण दवरतली. हाका लागून कच्चो माल काडप, उत्पादन, वापर आनी निमाणें रिसायकल करपाची म्हायती सांठोवन दवरतली.
बॅटरी रिसायकल वा हेर हेतू खातीर परतून वापरल्यार ताका नवो बीपीएन नंबर जारी जातलो. हाका लागून पोरन्या आनी नव्या बॅटरी मदीं पारदर्शकता सुनिश्चीत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
