भांगरभूंय | प्रतिनिधी
पणजी: इरेडाच्या (IREDA) सीएसआर उपक्रमा खाला उत्तर गोंय जिल्ह्यांतल्या एका वॉटर पंपिंग स्टेशनाचेर 45 किलोवॅट तांकीची ऑन-ग्रिड सौर ऊर्जा प्रणाली बसयल्या. हाचें उक्तावण केंद्रीय वीज आनी नवे तशेंच अक्षय्य ऊर्जा राज्यमंत्री श्रीपाद नायक हांणी केलें.
दर वर्सा सुमार 60,000 युनिट्साची निर्मिती अपेक्षीत आशिल्ल्या ह्या प्रकल्पाक लागून पंपिंग लोडच्या 100% सौरीकरणाचें ध्येय साध्य जातलें. भौशीक उदका पुरवठा यंत्रणेक अक्षय्य ऊर्जेक लागून दीर्घकाळ ऊर्जा मेळपाक शकता हें दाखोवपाचो ह्या प्रकल्पाचो हेतू.
हे कार्यावळी निमतान इरेडाचे सीएमडी प्रदीप कुमार दास हांणी म्हणलें, फकत अर्थसहाय्य करपा मुखार वचून सामुदायीक उदरगतींत प्रत्यक्षांत वांटो घेवन नितळ ऊर्जा विस्तारपाच्या इरेडाच्या सोपुताक हो उपक्रम अधोरेखीत करताा. वॉटर पंपींग स्टेशना सारकिल्ल्या भौशीक सेवांचें सौरीकरण करपा खातीर देशभरांत शाश्वत ऊर्जा संक्रमणा खातीर हे एक आदर्श, प्रातिनिधीक मॉडेल थारपाक शकता.
इरेडाच्या सीएसआर टीमींतले अधिकारी, गोंय पेयजल विभाग आनी थळावे हे कार्यावळीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
