भांगरभूंय | प्रतिनिधी
सर्वोच्च फुडारी अयतुल्ला अली खामेनेई हांकां मरण
खामेनेई हाची धूव, जावंय, नात आनी सून हांकांय मरण
इराणांत 40 दिसांचो राष्ट्रीय दुखवटो जाहीर
खबरां संस्था
तेहरान : इझ्रायल आनी अमेरिकेन केल्ल्या भिरांकूळ हवाई हल्ल्यांत इराणचे सर्वोच्च फुडारी अयतुल्ला अली खामेनेई हांकां मरण आयलां. ते उपरांत निर्माण जाल्ली राजकी पोकळी भरून काडचे खातीर इराणान व्हड पावल उखल्लां. खामेनेई हांचे उपरांत तांचो पूत मोजतबा तांचें पद सांबाळटले. ज्येश्ठ धर्मगुरू आयतुल्ला अलीरेझा अराफी हांची देशाचे तात्पुरते सर्वोच्च फुडारी म्हूण नेमणूक केल्या. इराणच्या सरकारी खबरां संस्थेन हे खबरेक दुजोरो दिला. नव्या सर्वोच्च फुडाऱ्याची रितसर निवड जाय मेरेन अराफी देशाची जापसालदारकी सांबाळटले.
अमेरिका- इझ्रायलच्या हल्ल्यांत इराणचे सर्वोच्च फुडारी अयातुल्ला अली खामेनेई हांकां मरण आयलां. इराणच्या तसनीम आनी फार्स ह्या खबरा संस्थांनी हाची पुश्टी केल्या. ह्या हल्ल्यांत खामेनेई हाची धूव, जावंय, नात आनी सून हांकांय मरण आयलां. इराणांत 40 दिसांचो राष्ट्रीय दुखवटो आनी सात दिसांचे भौशीक सुटयेची घोशणा केल्या.
इराणच्या संविधाना प्रमाण, सर्वोच्च फुडाऱ्याच्या मरणा उपरांत एक अंतरीम नेतृत्व परिशद देशाचो कारभार पळयता. हे परिशदेंत इराणचे राष्ट्रपती मसूद पजेश्कियन, मुख्य न्यायाधीश गुलाम होसैनी मोहसेनी एजेइ आनी गार्जियन कौन्सिलचे प्रतिनिधी म्हूण धर्मतज्ञ अयातुल्ला अराफी हांचो आस्पाव केला. ही तीन वांगड्यांची परिशद सध्याच्या कठीण काळांत देशाचें नेतृत्व करतली. अराफी हांची फकीह म्हणल्यार ‘धर्मविद’ वांगडी म्हूण निवड केल्या. तांणी तात्पुरत्या स्वरुपांत सर्वोच्च पदाची जापसालदारकी स्विकारल्या.
86 वर्सां पिरायेचे अयातुल्ला अली खामेनेई हांचें मरण इराणा खातीर व्हड धपको आसा. अमेरिका आनी इझ्रायलान केल्ले संयुक्त लश्करी कारवायेंत इराणांतले खूबशे लश्करी तळ आनी सरकारी इमारतींक लक्ष्य केल्ले. ह्या हल्ल्यांत खामेनेई हांचे सयत कांय वरिश्ठ लश्करी अधिकाऱ्यांक लेगीत मरण आयिल्ल्याची खबर आसा. अमेरिकेचे राष्ट्राध्यक्ष डोनाल्ड ट्रम्प आनी इझ्रायलाचे प्रधानमंत्री बेंजामिन नेतन्याहू हांणी सगल्यांत आदीं ह्या मरणाची घोशणा केल्ली, जाका उपरांत इराणान लेगीत अधिकृत तरेन दुजोरो दिला. सध्या इराण एका खूब कठीण आनी इतिहासीक मोडणाचेर उबो आसा. एके वटेन भायल्या हल्ल्यांचें व्हड चेपण आसा, जाल्यार दुसरे वटेन देशा भितर राजकी अस्थिरता निर्माण जावपाची भिरांत आसा. अशे परिस्थितींत अयातुल्ला अराफी हांचे सारक्या धर्मगुरूची नेमणूक करून इराणान आपली संविधानीक प्रक्रिया चालू दवरल्या. नव्या सर्वोच्च फुडाऱ्याची निवड जाय मेरेन ही अंतरीम परिशद इराणच्या धोरणात्मक निर्णयांची जापसालदारकी घेतले. पुराय संवसाराचें लक्ष आतां इराणच्या फुडल्या पावलां कडेन आनी अराफी हांच्या नेतृत्वा कडेन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
