भांगरभूंय | प्रतिनिधी
इस्लामाबाद/ढाका/बँकॉकः इराण झुजाचो परिणाम आतां आशियांतल्या जायत्या देशांनी जाणवता. तेल आनी वायू पुरवणेचेर जाल्ल्या परिणामाक लागून उण्यांत उणें 9 आशियायी देशांनी उर्जेचें संकश्ट आनीक वाडलां. परिस्थिती अशी आसा की वेगवेगळ्या देशांक इंधन वाटावपा खातीर आनी उर्जा संकश्टांतल्यान भायर सरपा खातीर खर पावलां उबारचीं पडल्यांत.
बांगलादेशांत वीज आनी इंधन वापर उणो जावचो म्हणून सगली विद्यापिठां बंद केल्यात. मजगतीं, थायलंडांत सरकारी कार्यालयांनी लिफ्ट वापरपाचेर बंदी घालून कर्मचाऱ्यांक सोपणां वापरपाची सुचोवणी दिल्या आनी ‘वर्क फ्रॉम होम’ चालीक लायल्या.
दुसरे वटेन पाकिस्तानांत खर्च उणो करपा खातीर मंत्र्यांचे पगार आनी विदेश भोंवडेचेर बंदी घाल्या आनी सरकारी खर्च आनी इंधन वापर उणो करपाचे निर्णय घेतल्यात.
खरें म्हणल्यार इराण आनी अमेरिका-इझ्राएल हांचे मदल्या झुजाक लागून होर्मुझ सामुद्रधुनी बंद आशिल्ल्यान तेलाची पुरवण खंडीत जाल्या. होर्मुझ सामुद्रधुनी हो संवसारांतलो एक म्हत्वाचो दर्यामार्ग. संवसारांतली सुमार 20% तेलाची पुरवण दर वर्सा ह्या मार्गांतल्यान वता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
