भांगरभूंय | प्रतिनिधी
नवी दिल्ली: अमेरिका आनी इझ्रायलान इराणाचेर केल्ल्या संयुक्त लश्करी हल्ल्या उपरांत आखाती वाठारांत ताण वाडला. ही परिस्थिती पळोवन भारत सरकारान शेनवारा इराण, इझ्रायल सयत आखाती देशांनी रावपी आपल्या नागरिकां खातीर सल्लागार सुचवणी जारी करून तांकां घरांतूच रावपाचो उलो मारला.
इराण, इझ्रायल सयत युएई, साउदी अरेबिया, जॉर्डन, बहरीन आनी पॅलेस्टायनांतल्या भारतीय दूतावासांनी आपल्या नागरिकांक सावधान रावपाचो आनी गरजे भायलो प्रवास टाळपाचो सल्लो दिला. तशेंच जॉर्डनांतल्या भारतीय पर्यटकांक हवाई प्रवासांत आडमेळीं येवंक शकतात तेन्ना ताचे पयलीं देश सोडपाचो सल्लो दिला.
इराणांत शिकपी भारतीय विद्यार्थ्यांचे सुरक्षे विशीं जम्मू-काश्मीर स्टुडंट असोसिएशनान प्रधानमंत्री नरेंद्र मोदी हांकां पत्र बरयलां. संघटनेन विद्यार्थ्यांक परतून हाडपाची मागणी केल्या.
शेनवारा सकाळीं इझ्रायलान इराणी राजधानी तेहरान सयत जायत्या शारांचेर हल्लो केलो. ताका जाप दितना इराणान सुमार 400 क्षेपणास्त्रां उडयलीं. तातूंत इझ्राएल, कुवेत, कतार, बहरीन, साउदी अरेबिया आनी दुबय हांगच्या अमेरिकेच्या स्थळांक लक्ष्य केलें.
इझ्राएलांत 41 हजारां परस चड भारतीय
इराणाची राजधानी तेहरानांतल्या भारतीय दूतावासान म्हणलां, जानेवारी मेरेन धा हजारां परस चड भारतीय इराणांत रावताले. तातूंतले व्हड प्रमाणांत थंय वैजकी आनी हेर अभ्यासक्रम शिकपी विद्यार्थी आशिल्ले.
मजगतीं, इझ्राएलांत भारतीय मूळचे 41 हजारां परस चड लोक रावतात. लोकांनी आपल्या लागींच्या सुरक्षीत आलाशिऱ्याचो हिशोब दवरचो आनी गरजे भायर प्रवास करचो न्हय अशें आवाहन दूतावासान केलां. खंयच्याय आणीबाणीच्या वेळार थळाव्या प्रशासनाच्यो सुचवण्यो पाळप गरजेचें अशें सांगलां.
सरकारान म्हणलें- आमी परिस्थितीचेर नदर दवरतात
ह्या देशांतल्या परिस्थितीचेर सतत नदर दवरता आनी दूतावास थळाव्या प्रशासना कडेन संपर्कांत आसा अशें भारत सरकारान सांगलां. गरज पडल्यार फुडली कारवाय करतले.
भारतीय नागरिकांनी सध्या भियेवचे परस सादूर रावप, फकत अधिकृत म्हायतीचेर विस्वास दवरचो आनी कसलीच आणीबाणी जाल्यार बेगोबेग संबंदीत दूतावासाक संपर्क करचो असो उलो मारला.
विद्यार्थ्यांचे सुरक्षेचो हुस्को वाडत आसा
जेकेएसएच्या म्हणण्या प्रमाण इराणांत व्हड प्रमाणांत काश्मीरी विद्यार्थी एमबीबीएस आनी हेर वैजकी अभ्यासक्रम घेतात. 5 मार्च 2026 दिसा ‘उलूमपाय’ आनी प्री-इंटर्नशिप सारकिल्ल्यो म्हत्वाच्यो राष्ट्रीय परिक्षा जवपाच्यो आसात. सध्या जायते विद्यार्थी देश सोडून वचूंक शकनात.
एके वटेन विद्यार्थ्यांक तांच्या सुरक्षेचो हुस्को आसा, जाल्यार दुसरे वटेन शिक्षण आनी फुडाराचो प्रस्न आसा अशें जेकेएसएन सांगलें. परराश्ट्र मंत्रालय, तेहरानांतलें भारतीय दूतावास आनी इराणी प्रशासन हांचे मदीं बरो समन्वय आनी गरज पडल्यार सुरक्षीत लोकांक भायर सरपाची वेवस्था करपाची मागणी संघटणेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
