भांगरभूंय | प्रतिनिधी
फाजिल्का: आखाती देशांनी चालू आशिल्ल्या झुजाचो आतां पंजाबांतल्या बासमती तांदूळ निर्यात करप्यांचेर सरळ परिणाम जाला. फाजिल्का जिल्ह्यांतल्या जलालाबाद विशीं उलयतना हांगाच्यान निर्गत जावपी लाखांनी टन बासमती तांदूळ वाटेर आडकला.
झुजाची स्थिती पळयल्यार आतां जहाज येरादारी एजन्सी दर कंटेनराक २००० डॉलर मागतात, जें तांकां फारीक करपाक मेळनात. हे खातीर तांणी केंद्र सरकाराक हस्तक्षेप करपाची मागणी केल्या.
जलालाबादाचे तांदूळ निर्यातदार कपिल देव गुंबर हांणी सांगलें : फाजिल्का जिल्ह्यांत शेतकार बासमती तांदळाची लागवड करतात. ११२१ जातीचो बासमती तांदूळ आखाती देशांनी पसंत करतात. ते फाटल्या १५ वर्सां सावन बासमती तांदूळ निर्यातीचें काम करतात. लाखांनी टन तांदूळ भारतांतल्यान आखाती देशांक धाडटात.
तांदूळ वाटेक आडकलो
इराण- इझ्राएल झुजाक लागून तांदूळ वाटेर आडकला. दुबय, इराणा सयत आखाती देशांनी धाडपाचे लाखांनी टन बासमती तांदूळ आसा. ताचे कडेन सुमार १५० कंटेनर आसात, तातूंतले कांय कंटेनर दर्यांत, बंदरांनी वा ट्रकांत आसात, ते थंय वाट पळयतात अशें तांणी सांगलें.
पयलींच थारायिल्ल्या भाड्या प्रमाण तांदूळ निर्यात करतात. आतां परिस्थिती अशी आसा की झुजाक लागून वाटेर अडकल्ल्या तांदळा खातीर जहाज एजन्सी ‘झुज शुल्क’ ह्या नांवान दर कंटेनरा फाटल्यान २००० डॉलर मागतात. हाका लागून तांदळाचो दर क्विंटलाक ८०० रुपया वाडटलो, पूण तांकां इतलो फायदो (मार्जिन) ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
