इराण आक्रमक, मध्यपूर्व देशांक धमकी

भांगरभूंय | प्रतिनिधी

व्हड 8 पूल करतले उद्ध्वस्त

इराणांतलो बी 1 पूल हल्ल्यांत उद्ध्वस्त

कुवेटांतल्या उदक शुद्धीकरण प्रकल्पाचेर हल्लो

खबरां संस्था

तेलअवीव/तेहरान : इराणान मध्यपूर्वेंतल्या 8 व्हड पुलांची वळेरी जाहीर करून ते उद्ध्वस्त करपाची धमकी दिल्या. इराण ह्या पुलांक सामरीक नदरेन म्हत्वाचे मानता, कारण ते हेर देशांचे कनेक्टिव्हिटी आनी येरादारी खातीर खूब गरजेचें आसात.

अहवाला प्रमाम, इराणाचे वळेरेंत कुवेट, यूएई, सावदी अरेबिया आनी जॉर्डनांतल्या खूब म्हत्वाच्या पुलांचो आस्पाव आसा. तातूंत शेख जाबेर अल-अहमद दर्या पूल (कुवेट), खेख जायद ब्रीज, अल मकता ब्रीज, शेख खलिफा ब्रीज (यूएई), कींग फहद कॉजवे (सावदी अरेबिया- बरहीन) आनी जॉर्डनांतलो कींग हुसेन, जामिया आनी अबदून ब्रीज हांचो आस्पाव आसा.

हाचे आदीं बिरेस्तारा अमेरिका आनी इझ्रायलान इराणांतल्या करज शारांत बी  पुलाचेर दोनदां हल्लो केल्लो. ह्या हल्ल्यांत दोगांक मरण आयलें, तशेंच पूल पुराय उद्ध्वस्त जालो. हो पूल पोरूंच सुरू जाल्लो आनी तो मध्यपूर्वेंतलो सगल्यांत उंच पूल मानताले. सुमार 1050 मिटर लांब आनी 136 मिटर उंच हो पूल बांदपा कातीर सुमार 400 दशलक्ष डॉलर (सुमार 3,800 कोटी रुपया) खर्च जाल्ले.

मजगतीं, कुवेटांतल्या उदक शुद्धीकरण (डिसॅनिलेशन) प्रकल्प आनी तेल शुद्धीकरण केंद्राचेर इराणान हल्लो केल्ल्याची म्हायती अधिकृत सुत्रांनी दिल्या. ह्या हल्ल्यांक लागून गरजेचें उदक आनी वीज पुरवण प्रणालीचेर परिणाम जाला, पूण प्रशासनान परिस्थिती नियंत्रणांत आशिल्ल्याचें म्हणलां.

अमेरिकेचे राष्ट्राध्यक्ष डोनाल्ड ट्रम्प हांणी इराणा आड आक्रमक भुमिका गेवन इराणाची उरिल्ली मुळावी सुविधा नश्ट करपाची कार्यवाही अजून पुराय तरेन सुरू लेगीत जावंक ना, अशी शिटकावणी दिल्या.

इराणा कडल्यान लेगीत परती जाप दिवपाची भास अदीक खर केल्या. अमेरिकेन आनी इझ्रायलान हल्ले वाडयले जाल्यार मध्यपूर्वेंतल्यो अमेरिकेच्या सगल्या सुवातांचेर हल्ले करतले, अशें म्हणलां.

शुक्रारा सकाळीं यूएईंतल्या गॅस प्रकल्पाचेर लेगीत हल्लो करपाचो यत्न जालो, जाल्यार इझ्रायलान सोडिल्ल्या क्षेपणास्त्रांक लागून खूबश्या घरांचें आनी गाडयांचें लुकसाण जालां.

हे फाटभुंयेर ब्रिटनान कुवेटाचे सुरक्षे खातीर रॅपीड सेंट्री हवाई संरक्षण प्रणाली धाडपाचो निर्णय घेतला, अशी म्हायती प्रधानमंत्री कीर स्टारमर हांणी दिल्या.