भांगरभूंय | प्रतिनिधी
टिकमसिंग वर्मा हांणी मारलो ज्येश्ठांक सादूर रावपाचो उलो
मडगांव : फातोड्डें आनी चिखलेच्या ज्येश्ठ नागरिकांक तोतया पुलिसांनी फटोवपाच्या प्रकरणांत आजूनय कोणाकूच अटक जावंक ना. मात, ह्यान पयलींच्या रायच्या चेन चोरी प्रकरणांत इराणी टोळयेंतल्या वांगड्याक पुण्यां अटक केल्या. ताचे कडल्यान आनीक म्हायती घेवपाचे यत्न सध्या पुलीस करतात, अशी म्हायती दक्षीण गोंय पुलीस अधीक्षक टिकमसिंग वर्मा हांणी दिली.
श्री. वर्मा हांणी पत्रकार परिशद घेवन ज्येश्ठ नागरिकांक फटोवपी टोळी सध्या सक्रीय आशिल्ल्यान, तांचे पसून सांबाळून रावपाचो उलो मारला. फातोड्डें आनी चिखले, वास्को दोन दिसां पयली ज्येश्ठ नागरिकांक एकटे पळोवन तांच्यो भांगराच्यो वस्ती लुटपाच्यो घडणुको घडल्यो. दुबावीत हे खातीर काळ्या रंगाची दुचाकी वापरतात. चालक हॅल्मेट घालता.
दुबावितान ज्येश्ठ नागरिकांक भांगराच्यो वस्ती घालप धोक्याचें आशिल्ल्याचें सांगून त्यो काडून आपल्या कडेन आशिल्ल्या कागदांत दवरपाक लायल्यो. दुबावीत थंयच्यान वतकच कागद उगडून पळयल्यार त्या कागदांत भांगरा वस्ती नाशिल्ल्याचें दिसलें. ह्या दोनूय घडणुकांनी दुबावितांनी ७० वर्सां परस चड पिरायेच्या लोकांक लक्ष्य केलां. अशी जर गजाल घडली जाल्यार ११२ वा १०० नंबराचेर फोन करून म्हायती दिवची, असो उलो श्री.वर्मा हांणी मारलो.
फाटल्या वर्साय अशे तरेन ज्येश्ठ नागरिकांक फटोवपाचे प्रकार घडिल्ले. तांतल्या एका प्रकरणांत पुणे महाराष्ट्रांतल्यान एकल्याक अटक केल्या. ताचे कडल्यान चडांत चड म्हायती घेवपाचें काम सुरू आसा. दरेका पुलीस स्टेशनांत एकटे रावपी ज्येश्ठ नागरिकांची वळेरी आशिल्ल्यान तांच्या घरा पुलीस भेट दितात. मात कुटुंबा सयत रावपी ज्येश्ट नागरिकांची नोंदणी पुलिसां कडेन ना, अशेंय सांगलें. मेळिल्ले म्हायती प्रमाण, रायच्या सुषमा शिरोडकार हांच्या गळ्यांतली सरपळी चोरी केल्ल्या प्रकरणांत इराणी टोळयेंतलो दुबावीत रहिम मिर्झा हाका मायणा कुडतरी पुलिसांनी जुलयांत अटक केल्या.
ज्येश्ठ नागरिकांक सावध रावपाचो उलो
खंयचोच पुलीस नागरिकां कडल्यान वस्तू मागिना. असो प्रकार घडल्यार पुलिसांक कॉल करचो आनी सादुरताय बाळगुची, असो उलो टिकमसिंग वर्मा हांणी ज्येश्ठ नागरिकांक मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
