भांगरभूंय | प्रतिनिधी
काँग्रेसीचो आरोप; दिल्ली सयत गोंयांतलें राजकारण तापलें
पणजी : केंद्रीय मंत्री स्मृती इराणी हांची धूव गोंयांत बेकायदो बार अॅण्ड रेस्टॉरंट चलयता, असो आरोप काँग्रेसीचे फुडारी पवन खेरा हांणी दिल्लींत केला. ताका लागून दिल्ली सयत गोंयच्या राजकारणांत शेनवारा खवदळ पडलो. सरकारान ह्या प्रकरणांत बेगोबेग कारवाय केली ना जाल्यार रस्त्यार देंवपाची शिटकावणी काँग्रेस प्रदेशाध्यक्ष अमीत पाटकार हांणी पणजे पत्रकार परिशद घेवन दिल्या.
काँग्रेसीचे केंद्रीय फुडारी पवन खेरा हांणी शेनवारा दिल्लींत पत्रकार परिशद घेवन केंद्रीय मंत्री स्मृती इराणी हांच्या धुंवेचेर जायते आरोप केले. स्मृती इराणी हांची धूव झोईश इराणी गोंयांत वर्सा पयलीं मरण आयिल्ल्या व्यक्तीच्या नांवांन बार अॅण्ड रेस्टॉरंट चलयता. झोईशान गोंयांतल्या ‘सिली सोल्स’ बार अॅण्ड रेस्टॉरंटाचो परवानो जून 2022त घेतिल्लो. हो परवानो ज्या व्यक्तीच्या नांवार घेतला, त्या व्यक्तीक मे 2021त मरण आयलां, अशें खेरा हांणी सांगलें. झोईश मरण आयिल्ल्याच्या नांवांन बार अॅण्ड रेस्टॉरंट चलयता, ते खातीर एका अधिकाऱ्यान तिका कारणां दाखयात नोटीस जारी केल्ली. पूण ते उपरांत रोखडीच त्या अधिकाऱ्याची बदली केली, असो दावो तांणी केला.
गोंयांतल्या कायद्या प्रमाण बार अॅण्ड रेस्टॉरंटाचो परवानो एकदाच दितात, अशें आसतना सिली सोल्स नांवाचो बार अॅण्ड रेस्टॉरंटाक दोन खेपे परवानो कसो दिलो, असो प्रस्न तांणी केला. स्मृती इराणी हांच्या चलयेचें हे कृत्य बेकायदो आसा. ताका लागून ह्या प्रकरणांत तांणी बेगोबेग मंत्रीपदाचो राजिनामो दिवचो, अशी मागणी पवन खेरा हांणी
केल्या.
म्हजी चली शिकता, बार चलयना : इराणी
नवी दिल्ली : म्हजी 18 वर्सांची चली शिकता. बार चलयना. तिचेर केल्लो हो हल्लो निंदनीय आसा. आतां हांव कोर्टांत हाचेर जाप मागतलीं. म्हजी चली सामकी सादारण जीण जगता. तिचो दोश इतलोच की तिची आवय सोनिया गांधी आनी राहुल गांधी हांचे आड पत्रकार परिशदो घेता. 2024 त राहुल गांधीक काँग्रेसीन अमेठीक धाडचो. हांव ताका दणदणीत हारोवन दाखयतां, अशें स्मृती इराणीन काल पत्रकार परिशदेंत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
