भांगरभूंय | प्रतिनिधी
भारतीय तारवट्यांची सुटका करपाची भारताची मागणी
नवी दिल्ली, खबरां संस्था : इराणच्या ताब्यांत आशिल्ल्या सुमार ४० तारवट्यांची सुटका करची, असो उलो भारतान मारला. फाटल्या आठ म्हयन्यांच्या काळांत चार वेगवेगळ्यो वेपारी बोटी इराणान ताब्यांत घेतल्यात.
बंदर, बोटीची येरादारी आनी जलमार्ग विभागाचे मंत्री सर्बानंद सोनोवाल हांणी तेहरानांत इराणचे परराष्ट्रमंत्री होसेन आमिर अब्दुलाहियन हांचे वांगडा जाल्ले भेटींत ही विनवणी केली. भारतान मागणी केले उपरांत हे बसकेचें आयोजन केलें, अशें हे घडामोडींची म्हायती आशिल्ल्या सुत्रांनी सांगलें.
ह्या वेळार इराणाच्या ताब्यांत आशिल्ल्या सगळ्या भारतीय तारवट्यांची सुटका करपाची मागणी सोनोवल हांणी केली. ताचेर अब्दुलाहियन हांणी सोनोवल हांकां, सुटका करपाक इराण सकारात्मक आसा. मात, कायदेशीर प्रक्रिया पाळप गरजेचें आशिल्ल्यान ते खातीर उशीर जाता. सामरिक नदरेन म्हत्वाचें आशिल्लें छाबार हें इराणांतलें बंदर कार्यरत करपाक भारतान इराणा वांगडा १० वर्सांची कबलात केल्या. ताका लागून सोनोवल इराणच्या दौर्याचेर आसतना ही भेट जाली.
सुत्रांनी दिल्ले म्हायती प्रमाण, फाटल्या आठ म्हयन्यांच्या काळांत इराणान वेगवेगळ्या आरोपां खाला ‘स्टिव्हन’, ‘ग्लोबल शेरिलीन’, ‘मार्गोल’ आनी ‘एमएससी एरिस’ ह्यो चार वेपारी बोटी आनी तारवट्यांक ताब्यांत घेतल्या. हांतली ‘स्टिव्हन’ ही बोट १२ सप्टेंबर २०२३ दिसा तस्करीच्या आरोपा खाला ताब्यांत घेतिल्ली. ताचेर णव भारतीय तारवटी आशिल्ले. तांतल्या तिगांक इराणी अधिकारी २४ एप्रिलाक खंयतरी घेवन गेले. आतां तांची कांयच खबर ना. हातुंतल्या एकल्याचोय संपर्क जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
