भांगरभूंय | प्रतिनिधी
इराणांत बायलांनी रस्त्यार देंवून हिजाबा आड निशेध उक्तायलो. इराणांत हिजाबा संबंदीं खूब खर नेम आशिल्ल्यान ह्या निशेधाची संवसारभर चर्चा जाली. इराण हें कट्टर इस्लामी राश्ट्र आशिल्ल्यान बायलां खातीर खर भेसाची पद्दत आसा. 1979 त इराणांत इस्लामी क्रांती जायत सावन बायलांच्या भेसा विशीं सरकारान कांय नेम केल्या. ते मोडपी बायलांक सरळ अटक करून बंदखणींत घालतात. आतां मेरेन लाखांनी बायलांचेर आरोप जाल्यात आनी शेंकड्यांनी बायलांक हिजाब सारको घालूंक नाशिल्ल्यान अटक केल्या.
हिजाबाच्या खर नेमांचें उल्लंघन केल्ल्यान 22 वर्सां पिरायेचे चलयेक पुलिसांनी अटक केली. पुलिसांच्या ताब्यांत आसतना तिका मरण आयलें. काळजाचो आताक आयिल्ल्यान ती मेली, अशें पुलिसांनी सांगलां तरी
तांच्या मारपेटाक लागून ती मेल्या, अशें ते सुवातेर आशिल्ल्या बायलांचें मत.
इराणांतल्या बायलांनी रस्त्यार देंवून हे घडणुकेचो निशेध केलो. हे चळवळींत बायलांनी हिजाबा वयल्या खर निर्बंधांचोय निशेध केलो. इराणाची राजधानी तेहरान सयत सगळ्या मुखेल शारांनी बायलांनी खर आंदोलन केलें. वांगडा दादलेय आशिल्ले. कुर्दिस्तान शारांतल्या निशेधा वेळार सुरक्षा रक्षकांनी केल्ल्या फारपेटांत तीग जाणांक मरण आयलें. उपरांत आंदोलन चड खर जालें. इराणांत हिजाबा आड हो पयलो निशेध न्हय, 2019 वर्साय अशेच तरेचीं निदर्शनां जाल्लीं. हे खेपे मात ही चळवळ खूब खर जाल्या आनी बायलांच्या हिजाबाच्या प्रस्नां वांगडाच लोक रस्त्यार देंवून थंयच्या हुकूमशाही सरकारा आड घोशणा दिवपाक लागल्यात.
इराणी अध्यक्ष इब्राहिम रायसी हे इस्लामाचे तज्ञ मानतात आनी ते शरीयत कायद्याची खर अंमलबजावणी करपाचेर विस्वास दवरता. ते ही चळवळ कशी हाताळटात हाचेर पुराय संवसाराचें लक्ष लागिल्लें. सुरवेक इराणी सरकारान ही चळवळ मोडून काडपाक
खर भुमिका घेतली. पुलिसांनी बळगें वापरलें, पूण बायलां आंदोलकांनी मीठ घालें ना. हे चळवळीक अमेरिका आनी इस्रायलाचो भितरल्यान तेंको आसा, असो आरोप इराणान केलो, पूण कांय उपेग जालो ना.
हिजाबा आडची ही चळवळ बंद जावपाचें लक्षण दिसना म्हणटकच निमाणें इराण सरकाराक बायलां शक्ती मुखार बागोवचेंच पडलें. न्यायवेवस्था आनी संसद हिजाबाची सक्ती रद्द करपाचो विचार करता, अशें इराणाचे अॅटर्नी जनरल मुहम्मद जफर मोताजेरी हांणी सांगलां. मात बऱ्याच आंदोलकांचो हाचेर विस्वास ना. ते म्हणटात, सरकारान अधिकृत घोशणा करची.
तरीय हिजाबा संबंदी कायदो बदलपाची गरज आसा. सरकार हिजाब फाटीं घेवपाचो विचार करता, अशें इराणाचो एक वरिश्ठ अधिकारी सांगता, ही एक व्हडली इतिहासीक घडणूक. संवसारांतल्या खंयच्याय व्हड सत्तेक बायलांचे शक्ती मुखार बागोवचेंच पडटा हें इराणी बायलांनी दाखयलां.
इराणा सारकिल्या धर्माचे बाबतींत कडव्या देशाच्या सरकाराक नारी शक्ती मुखार बागोवचें पडटा, हें बायलांचें व्हडलें जैत!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
