भांगरभूंय | प्रतिनिधी
गुपीत तरेन अणूबॉम्ब करताले : नेत्यान्याहू
4 इराणी लश्करी कमांडर, 6 अणू शास्त्रज्ञांक मरण
अणू कार्यावळ नागरी वापरा खातीर : इराण
खबरां संस्था
तेहरान : शुक्रारा सकाळीं इझ्रायलान इराणाच्या अणूउर्जा आनी हेर लश्करी तळांचेर व्हड हल्लो केलो. तातूंत 4 इराणी लश्करी कमांडर आनी 6 अणू शास्त्रज्ञांक मरण आयलें. हल्ल्यांत 78 जाणांक मरण आयलां.
एका वरिश्ठ इराणी अधिकाऱ्यान एके खबरां संस्थेक दिल्ले म्हायती प्रमाण राजधानी तेहरानांतल्या शहराक शाहीद महालती नांवाच्या वाठारांत हो हल्लो जालो. थंय उच्च पदा वयले इराणी लश्करी अधिकारी रावतात. हल्ल्यांत 3 इमारती उध्वस्त जाल्यो.
इझ्रायली लश्करी अधिकाऱ्यान दावो केला ते प्रमाण, इराण गुप्त तरेन अण्वस्त्रां विकसीत करता. कांय दिसां भितर 15 अण्वस्त्रां तयार करपा इतलें साहित्य तांचे कडेन आसा. तें थांबोवचे खातीर हो हल्लो केलो.
इझ्रायली सैन्यान म्हणलां, हो एक प्री-एम्पटीव स्ट्रायक आशिल्लो. म्हणल्यार, इराण कसलीय व्हड कारवाय करचो न्हय हे खातीर धोको वळखून इझ्रायलान हल्लो केलो. फुडारांत अशे खूबशे हल्लो जावपाक शकतात, अशेंय इझ्रायली सैन्यान म्हणलां.
इझ्रायली प्रधानमंत्री बेंजामीन नेतान्याहू हांणी सांगलें, इराण गुप्त तरेन अण्वस्त्रां तयार करता. हो आमच्या देशा खातीर धोको आशिल्लो. हेच खातीर आपल्या सैन्यान नतान्झ सारक्या म्हत्वाच्या अण्वस्त्रां थळांचें आनी कांय मुखेल इराणी शास्त्रज्ञांचेर हल्लो केलो.
हो हल्लो अश्या वेळार जालो, जेन्ना अमेरिका आनी इराण हांचे मदीं अणू करारा संबंदांत चर्चा चलताली. अमेरिकेचे अध्यक्ष डोनाल्ड ट्रम्प हांणी इझ्रायलाक हल्लो करपा पसून आडावपाचो यत्न केल्लो, कारण हाका लागून चर्चा बंद जावपाक शकता असो तांकां भंय आशिल्लो.
ह्या तणावा मजगतीं अमेरिकेन इराकांतल्यान आपल्या राजदूतांक परत आपयल्ले. अमेरिकेन मध्य पूर्वेक आशिल्ल्या आपल्या सैनिकांच्या कुटुंबियांक लेगीत परत येवपाची परवानगी दिल्या. सध्या पर्शियन आखात आनी सरभोंवतणच्या वाठारांत सुमार 40 हजार अमेरिकन सैनीक तैनात आसात.
आंतरराष्ट्रीय अणू उर्जा संस्थेच्या (आयएईए) मतान इराणा कडेन इतलें युरेनियम आसा जातूंत एका वर्सां परस उण्या काळांत 1- अणूबॉम्ब तयार करपाक शकता. इराण अणू विशीं म्हायती दिवपाक सेगीत न्हयकार दिता आनी तपासात आदार करिना, असो संस्थेन आरोप केला. फाटल्या 20 वर्सांत पयलेच खेपे संयुक्त राष्ट्रांचे हे देखरेख संस्थेन इराणा आड इतली खर कारवाय केल्या.
इराणान ह्या निर्णयाचेर खर टिका केली आनी तो पुराय तरेन राजकी आशिल्ल्याचें म्हणलां. इराणाच्या विदेश मंत्रालयान आनी देशाच्या अणूउर्जा संस्थेन संयुक्त निवेदनांत म्हणलां, अश्या निर्णयांक लागून आंतरराष्ट्रीय संस्थेच्या विस्वासार्हतेचेर प्रस्नचिन्न उपस्थीत जाता.
इराणान दर खेपे सांगलां, तांची अणू कार्यावळ फक्त शांततापूर्ण आनी नागरी वापरा खातीर आसा, देखीक वीज निर्मीती वा वखदां तयार करप, शस्त्रां तयार करपा खातीर न्हय.
हल्ल्यांत आमचो वांटो ना : अमेरिका
ह्या हल्ल्यांत आपलो वांटो नाशिल्ल्याचें अमेरिकेन स्पश्ट केलां. अमेरिकेचे विदेश मंत्री मार्को रुबियो हांणी म्हणलां, इझ्रायलान हो हल्लो स्वताच्या रक्षणा खातीर केला आनी तांणी इराणाक खंयचेच स्थितींत अमेरिकेच्या सैनिकांक वा तळांक लक्ष्य करचें न्हय, अशी शिटकावणी दिल्या.
‘आयएईए’चो इराणा आड थाराव मंजूर
आंतरराष्ट्रीय अणू उर्जा संस्थेन (आयएईए) बिरेस्तारा इराणा आड एक म्हत्वाचो थाराव मंजूर केला. संस्थेन म्हणिल्लें, इराण तांचे अणू कार्यावळी विशीं निश्चीत केल्ले नेम पाळिना. आयएईएच्या 35 देशांच्या मंडळांतल्या 19 देशांनी इराणा आडच्या ह्या थारावा वटेन मतदान केलें. तातूंत अमेरिका, ब्रिटन, फ्रान्स आनी जर्मनी हांचो आस्पाव आसा. जाल्यार रशिया आनी चीनान विरोधांत मतदान केलें. उरिल्ल्या देशांनी एकतर वांटो घेवंक ना वा मतदाना पासून पयस रावले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
