भांगरभूंय | प्रतिनिधी
पणजीः गोंयांत जावपी 54 व्या आंतरराष्ट्रीय चित्रपट महोत्सवाचे (इफ्फी) नांवनोंदणीक चित्रपट मोगींचो उपाट प्रतिसाद मेळ्ळा. फक्त 18 दिसांनी 1,198 प्रतिनिधींनी नोंदणी केल्या. ताका लागून अंदूंच्या इफ्फींत प्रतिनिधी संख्या वाडपाची शक्यताय आसा. अंदूं 20 ते 28 नोव्हेंबर ह्या काळांत इफ्फी जातलो.
पोरूं इफ्फींत वट्ट 6,774 प्रतिनिधींनी नोंदणी केल्ली. इफ्फीच्या काळांत हॉटेलां तशेंच टॅक्सी चालकांचो बरो वेवसाय जाता. 2021त इफ्फी खातीर 4,068 जाणांनी नोंदणी केल्ली. कोरोना म्हामारीक लागून 2020त इफ्फी जावंक नाशिल्लो. 2021त इफ्फी प्रत्यक्ष आनी व्हर्च्युयल अशे हायब्रीड पद्दतीन मनयिल्लो. ह्या महोत्सवा खातीर नोंदणी इफ्फीच्या अधिकृत संकेतथळा वयल्यान ऑनलायन पद्दतीन करपाक मेळटली. अंदूं मडगांवच्या रवीन्द्र भवनांत लेगीत कांय चित्रपट दाखयतले. महोत्सवाच्या इंडियन पॅनोरमा विभागाच्यो प्रवेशिका हे आदींच सोंपल्यात. ह्या विभागांत 26 फिचर आनी 21 नॉनफिचर चित्रपटांचो आस्पाव आसा.
विवीध निविदा उक्त्यो
इफ्फी खातीर गोंय मनरिजवण संस्थेन (ईएसजी) विवीध कामां खातीर निविदा मागयल्यात. तातूंत कंप्युटर, लॅपटॉप, कार्ड प्रिंटर दिवप, वायफाय जोडणी करप, तारांकीत हॉटेलांची निवड करप, अशा विवीध कामांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
