भांगरभूंय | प्रतिनिधी
-55 व्या इफ्फीचें दबाज्यान उक्तावणपणजीः इफ्फी आनी गोंया मदीं एक वेगळे नाते आसा. जेन्ना इफ्फी म्हणटा तेन्ना गोंयचो उगडास येता आनी गोंय म्हणटकच इफ्फीचो उगडास येता. इफ्फीन गोंया खातीर खूब कितें दिवन गोंयाक संवसारीक पांवड्यार व्हेलें, अशें मत मुख्यमंत्री डॉ. प्रमोद सावंत हांणी 55 व्या अंतरराष्ट्रीय चित्रपट महोत्सवाच्या उक्तावणा वेळार उक्तायलें.
अांतरराष्ट्रीय चित्रपट महोत्सव (इफ्फी) 2024 चे व्हडा दबाज्यान उक्तावण जालें. विवीध मनरिझवणेच्या कार्यावळींचो उपस्थीत लोकांनी सूरबस आस्वाद घेतलो. अंदूं इफ्फीच्या उक्तावणा वेळार एक खाशेलेपण पळोवपाक मेळ्ळें. बॉलीवूड तशेंच दक्षीणेंतल्या नामनेच्या चित्रपट कलाकारांनी आपली म्होर कार्यावळीचेर सोडली.
आदले मुख्यमंत्री स. मनोहर पर्रिकर हांणी इफ्फी पयलेच फावट गोंयांत हाडली. 2004 त गोंयांत सुरू जाल्लें इफ्फींक 2024 त 20 वर्सा पुराय जाल्यात. अंदूं तांचे भितर एक वेगळे नातें तयार जाला, अशें मुख्यमंत्र्यांनी म्हणलें.
इफ्फी लागून गोंयांत साधन सुविधा तयार जाल्यात. इफ्फींक भेट दिवपी अांतरराष्ट्रीय, राष्ट्रीय सोयरे तशेंच दिग्दर्शक आनी कलाकारांक आमी येवकार दितात. इफ्फी आमचें खाशेलेपण जावन आसा आनी हे कॅलॅण्डरांत नोंद आसा. प्रधानमंत्री नरेंद्र मोदी हांणी घेतिल्ल्या फुडाकारांक लागून इफ्फींत सुविधांनी सुदारणा जायत आसा, अशें मुख्यमंत्र्यांन सांगलें.
जाल्यार ह्या सुवाळ्याक उपस्थीत रावक शक्य नाशिल्ल्यान केंद्रीय म्हायती आनी प्रसारण मंत्री अश्विनी वैश्णव हांणी व्हीडीयो माध्यमा वरवीं संदेश दितना सांगलें, फिल्म क्षेत्राच्या उदरगती खातीर इफ्फी हो एक म्हत्वाचो मैलाचो फातर (मायलस्टोन) जावन रावला.
कन्टेट क्रिएटरांची अर्थवेवस्था आमी सुदारपाचे भर दिला. हे कन्टेट क्रिएटर भारताची तेजस्वी संस्कृती, जीणशैली, खाणा दाखयतात. तातूंत तंत्रगिन्यानाची भर पडिल्ल्यान ही कन्टेन्ट क्रिएटरांची सर्जनशील इकोसिस्टीम आसा, ताका आकार दिवपाक म्हत्वाची भुमिका निभायता. तुमचो गोंयांत राबितो बरो जावचो, नवी कल्पना येवची, तरणाट्यांक नवे गुरू मेळचें तशेंच तुमी दिल्ले कल्पनेक लागून आमच्या विचारांक वेगळी दिशा मेळटली, असो हावेस वैष्णव हांणी उक्तायलो.
सुरवातीक महमद रफी, तपन सिन्हा, अक्कीनेनी नागेश्वर राव, राज कपूर ह्या फिल्म मळा वयल्या म्हालगड्यांक आर्गां ओंपलीं. फिल्म कलाकार बोमन इराणीन तांची जीवन गाथा सांगली. ह्या वेळार ह्या म्हालगड्यांचे पोस्टल स्टॅम्प उजावाडाक हाडले. दक्षिणात्य चित्रपट अभिनेते नागार्जुना अक्किनेनी आनी तांची घरकान्न आमला अक्किनेनी हांचो भोवमान केलो.
तशेंच आर्ट ऑफ लिव्हींगचे श्री श्री श्री रवी शंकर हांची खासा उपस्थिती इफ्फीच्या उक्तावणा वेळार पळोवपाक मेळ्ळी. महावीर जैन हांणी निर्मीत केल्ल्या रवी शंकर हांचेर आदारीत चित्रपटाचे ट्रेलर ह्या वेळार उजावाडाक हाडले. ह्या वेळार उलयतना रवी शंकर हांणी सांगलें, कलाकार मनरिजवण करून लोकांचीं मनां जिखतात, पूण तांचेय जिणेंत दुख्ख, पिडा आसता. देखून कलाकारांनी आपली मानसीक भलायकी सांबाळप गरजेचें. सिनेमा मेळ हॅपीनेस इंडेक्सात उणें आसा. देखून ते वाडोवपा खातीर तरणाट्या कलाकारांक उर्बा दिवची.
तशेंच रणदीप हुड्डा हांचो स्वातंत्र्यवीर सावरकर हो भारतीय पॅनोरमा श्रेणींत ओपनींग फिल्म जावन आसा. ह्या वेळार हुड्डां हांचो भोवमान केलो. ते भायर फौजी 2 आनी काकबुशुंडी रामायण हे दुरदर्शनाचेर परतून येवपाचे आसा, ताचे कलाकार आनी निर्देशकांनी आपलें मत मांडलें.
तशेंच मानुशी चिल्लर, इशान खट्टर, ऑस्ट्रेलियाचे पारंपारीक कलाकार आनी हेरांनी आपले नृत्य सादर केले. अभिनेते अभिषेक बॅनर्जी आनी भुमी पेडणेंकार हांणी सुत्रसंचालन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
