भांगरभूंय | प्रतिनिधी
प्रिथुल कुमारः अंदूं अधिकृत कार्यावळीं परस मनरिजवणेचेर भर
भांगरभूंय । प्रतिनिधी
पणजीः गोंयांत 20 ते 28 नोव्हेंबर ह्या काळांत आयोजीत जावपी 54 व्या भारतीय आंतरराष्ट्रीय चित्रपट महोत्सवाच्या (इफ्फी) उक्तावण सुवाळ्याक माधुरी दिक्षीत, शाहीद कपूर, श्रेया सरन हांचे सयत साबार बॉलिवूड कलाकार हाजीर रावतले. अंदूंच्या उक्तावण सुवाळ्यांत अधिकृत कार्यावळी परस मनरिजवणेच्या कार्यावळींचेर चड भर दितले, अशी म्हायती, म्हायती खात्याचे अधिकारी प्रिथुल कुमार हांणी दिली.
इफ्फींत जावपी विवीध ‘मास्टर क्लास’ आनी ‘इन कॉन्व्हर्सेशनां’त विद्या बालन, राणी मुखर्जी, सारा अली खान, मनोज वाजपेयी, पंकज त्रिपाठी, नवाजुद्दीन सिद्दकी अशे बॉलिवूडचे दिग्गज कलाकार येतले. तेचवरी सनी देओल, मधूर भांडारकर, के. के. मेनन, विजय सेतुपती, बोनी कपूर, गुलशन ग्रोवर, करण जोहर, पंकज त्रिपाटी, अल्लू अरविंद, कार्तिकी गोन्साल्वीस हे कलाकार लेगीत येतले. तशेंच मायकल डग्लस, ब्रिलांटे मेंडोझा, ब्रेंडन गाल्वीन हे विदेशी कलाकार लेगीत हाजेरी लायतले. ‘सिने मेला’ इफ्फीचें खाशेलें आकर्शण आसतलें. तातूंत चित्रपट मळा कडेन संबंदीत विवीध अत्याधुनीक तंत्रज्ञानाचें प्रदर्शन मांडटले. मिरामार, रवीन्द्र भवन मडगांव आनी हणजूण्यां ओपन अॅर स्क्रिनींग दाखयतले. ‘सिने मेला’ ओपन अॅर स्किनींग सगळ्यां खातीर फुकट आसतलें. ते खातीर प्रतिनिधी नोंदणी करपाची गरज आसची ना, अशी म्हायती कुमार हांणी दिली.
प्रतिनिधी नोंदणी 6 हजारां वयर
सध्या इफ्फी खातीर 6 हजार 442 प्रतिनिधींनी नोंदणी केल्या. फुडल्या दोन दिसांनी हो आंकडो वाडपाची शक्यताय आसा. प्रतिनिधींक चित्रपट पळोवपाचो आसत जाल्यार दोन दीस आदीं संकेतथळार वा मोबायल अॅपा वयल्यान बुकींग करप गरजेचें आसा. अंदूं बुकींग सकाळीं 8 वरांचेर सुरू जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
