भांगरभूंय | प्रतिनिधी
सत्यजीत रे जिणें गौरव पुरस्कार फिलीप नॉयस हांकां जाहीर
भांगरभूंय । प्रतिनिधी
पणजीः गोंयांत जावपी 55 व्या भारतीय आंतरराष्ट्रीय चित्रपट महोत्सवाची (इफ्फी) सुरवात मायकल ग्रेसी दिग्दर्शीत ‘दी बॅटर मॅन’ ह्या चित्रपटान जातली. अंदूं मनाचो सत्यजीत रे जिणे गौरव पुरस्कार ऑस्ट्रेलियन दिग्दर्शक फिलीप नॉयस हांकां जाहीर जाला. केंद्रीय म्हायती आनी प्रसारण खात्याचे राज्यमंत्री डॉ. एस. मुरुगन हांणी दिल्लींत घेतिल्ले पत्रकार परिशदेंत ही घोशणा केली. ह्या वेळार प्रसून जोशी, वृंदा देशाय, शेखर कपूर आनी हेर मानेस्त हाजीर आशिल्ले.
अंदूंचे इफ्फी खातीर 101 देशांतल्यान 1,676 चित्रपटांच्यो प्रवेशिका आयिल्ल्यो. तातूंतले 81 देशांचे 180 परस चड चित्रपट दाखयतले. तातूंत 15 जागतीक प्रिमियर, 40 आशिया प्रिमियर, 3 आंटरा प्रिमियर जाल्यार 106 भारतीय प्रिमियर आसतले. अंदूंचो कंट्री ऑफ फोकस ऑस्र्टेलिया देश आसतलो. आंतरराष्ट्रीय विभागांत 15 चित्रपट दाखयतले. तातूंतले 12 आंतरराष्ट्रीय जाल्यार 3 भारतीय चित्रपट आसात. ह्या विभागांत जिखपी चित्रपटाक 40 लाख रुपयांचें इनाम दितले. आंतरराष्ट्रीय जुरी गटाच्या अध्यक्षपदार दिग्दर्शक आशुतोष गोवारीकर हांची निवड केल्या. इंडियन पॅनोरमा विभागांत 25 फिचर जाल्यार 20 नॉन फिचर चित्रपट दाखयतले. ह्या विभागाची सुरवात रणदीप हुडा दिग्दर्शीत स्वातंत्र्यवीर सावरकर ह्या चित्रपटान जातली. अंदूंचे इफ्फींत मोहम्मद रफी, राज कपूर, तपन सिन्हा आनी अक्किनेनी नागेश्वर राव हांकां आर्गां ओंपतले, अशें डॉ. मुरुगन हांणी सांगलें.
मास्टरक्लासींत ए. आर. रेहमान, मणिरत्नम
अंदूंचे इफ्फींत मास्टर क्लास तशेंच पऐनल डिक्शनांत ए. आर. रेहमान, मणिरत्नम, शबाना आझमी, विधू विनोद चोप्रा, फिलीप नॉयस आनी जॉन सील हांचो आस्पाव आसतलो.
मडगांव, फोंडें आयनॉक्सांत चित्रपट
डीपींत पांच मल्टिप्लेक्सांत 270 परस अदीक चित्रपट दाखयतले. अंदूं पयलेच खेपे मडगांव आयनॉक्सांत 4 जाल्यार फोंडें आयनॉक्सांत 2 थिएटरांनी इफ्फीचे चित्रपट दाखयतले. तशेंच पणजेच्या ऑयनॉक्स, सम्राट अशोक, मॅकिनेझ पऐलेस, पर्वरी आयनॉक्सांत चित्रपट दाखयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
