भांगरभूंय | प्रतिनिधी
पणजी: आयज डॉ. श्यामा प्रसाद मुखर्जी इनडोअर स्टेडियमांत ५५ व्या भारतीय आंतरराष्ट्रीय चित्रपट महोत्सवाचो समारोप सुवाळो जातलो. कथा सांगपाची कला आनी संवसारीक सिनेमाच्या भावनेचो उत्सव मनोवपी णव दिसांच्या सिनेमॅटीक उत्कृश्ठतायेचो समारोप आयच्या ह्या भव्य सुवाळ्यांत जातलो. ७५ देशांतले २०० परस चड चित्रपट, सिने मळावेले दिग्गजांचे मास्टरक्लास, आनी प्रेरणादायी पॅनेल चर्चे सयत, अंदूंचे इफ्फीन सिनेमांची तांक दाखोवन दिल्या.
भारतीय सिनेमाचो उत्सव
समारोप सुवाळ्याक भारताच्या सिनेमॅटीक मळावेलें चैतन्य आनी विविधतायेचो सांगोड घालतले. राष्ट्रीय आनी आंतरराष्ट्रीय माचयेर भारतीय चित्रपटांच्यो कलात्मकता, सर्जनशीलताय आनी सांस्कृतीक प्रभावांक मान दिवन महोत्सवाचें उत्कृश्ठ खीण अणभवपाक मेळटले. ह्या सुवाळ्याक चित्रपटांतले जायते दिग्गज हजर रावतले. हातूंत सुकुमार, दिल राजू, आनंद तिवारी, अमृतपाल सिंग बिद्रा आनी ऑस्ट्रेलियन निर्माते स्टीफन वोली अशे जायते प्रतिश्ठीत चित्रपट निर्माते हांचो आसपाव आसा.
संगीतकार अमाल मलिक आनी मामे खान हांचे सयत फामाद अभिनेतो अल्लू अर्जुन, रश्मिका मंदाना, जया प्रदा, श्रिया सरन, प्रतीक गांधी, समीर कोचर, श्रेया चौधरी, ऋत्विक भौमिक आनी नवीन कोहली हजर रावतले.
सांजवेळेर कलाकार आनी कलावंत संगीत, नाच आनी सिनेमॅटीक आकर्शणाचे मिश्रण आशिल्ली कार्यावळ सादर करतले. तशेंच चित्रपट निर्मिती मळार असाधारण कलाकृतींक प्रतिश्ठीत पुरस्कार भेटयतले. उत्कृश्ठ सिनेमॅटीक कामाचो भोवमान करीत बेस्ट फीचर फिल्मा खातीर महोत्सवांतलो सगळ्यांत प्रतिश्ठीत पुरस्कार भेटयतले. जाल्यार सर्वोत्कृश्ठ दिग्दर्शक, सर्वोत्कृश्ठ अभिनेतो (बायल आनी दादलो) आनी पदार्पणांतलें सर्वोकृश्ठ फीचर फिल्म हे खातीर पुरस्कार भेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
