इफ्फीची तयारी पुराय

भांगरभूंय | प्रतिनिधी

दक्षिणात्य अभिनेते राम चरण हांचे हस्तुकीं उक्तावणपणजीः गोंयांत जावपी 56 व्या इफ्फीची तयारी पुराय जाल्या. बिरेस्तारा 20 तारखेक इफ्फीचो उक्तावण सुवाळो जातलो. हाका लागून मंगळारा ईएसजी वाठारांत सावटीचें काम झुजा पांवड्यार सुरू जातलें. अंदूं पोरण्यां गोमॅको वाठारांत उक्तावण सुवाळो जातलो. हांगा आसनां वेवस्थेचें काम अजून चालू आसा. अंदूं पोरण्यां सचिवालयांतल्यान चित्रपट संबंदीत चित्ररथ मिरवणूक कला अकादमी मेरेन व्हरतले. मंगळारा पुलिसांनी दयानंद बांदोडकर रस्त्याचो हो वाठार, कला अकादमीची पळोवणी केली.

चित्ररथ मिरवणूक वेळार येरादारी सुटसुटीत जावची हे खातीर पुलिसांनी बांदोडकर रस्तो, सांतिनेज वाठार, बाल भवन, काकुलो मॉल, मिरामार सर्कल, पणजी बाजार वाठाराची तपासणी केली. हांगा व्हड प्रमाणांत पुलीस तैनात केल्ले. अंदूं 7,500 परस चड लोकांनी इफ्फी खातीर नोंदणी केल्या. मंगळारा नोंदणीकृत प्रतिनिधीं सयत मिडिया प्रतिनिधींक कार्डां वांटूपाचें काम सुरू जाला. हे खातीर कला अकादमी भायर रस्त्यार स्थापन केल्ल्या खाशेल्या बूथांचेर चित्रपट मोग्यांनी गर्दी केल्ली.

दर वर्सा इफ्फीचो उक्तावण सुवाळो श्यामा प्रसाद मुखर्जी स्टेडियमाचेर जाता. पूण अंदूं आयोजकांनी हो सुवाळो उक्त्या हवेच्या सुवातेर करपाचो निर्णय घेतला. केंद्रीय म्हायती आनी प्रसारण मंत्रालयान फाटल्या वर्सा अशी शिफारस केल्ली. पूण ह्या महोत्सवाचो समारोप सदचे भशेन श्यामा प्रसाद मुखर्जी स्टेडियमाचेर जातलो. समारोप सुवाळ्यांत कलाकार रजनीकांत आनी बालकृष्णन हांचो भारतीय सिनेमा मळार 50 वर्सांच्या योगदाना खातीर खासा भोवमान करतले.

अभिनेतो राम चरण करतले इफ्फीचें उक्तावण

-21 वर्सांनी आमिर खान इफ्फी महोत्सवाक

पणजीः 20 ते 28 नोव्हेंबर मेरेन गोंयांत जावपी 56 व्या इफ्फीचें उक्तावण दक्षिणात्य सिनेसृष्टीचे अभिनेते कोनिदीला राम चरण हांचे हस्तुकीं जातलें. तशेंच ह्या वर्साच्या आंतरराष्ट्रीय चित्रपट महोत्सवाचो उक्तावण सुवाळो पणजेच्या पोरण्या गोमॅकाँ मुखार उक्त्या हवेंत जातलो. हे खेपे 23 चित्ररथ मिरवणुकेंत आसतले. गोंयकार कलाकारांचे 11 चित्ररथ. गोंयची संस्कृताय आनी भारतीय चित्रपटांक संबंदीत चित्ररथ आसतले. तशेंच राष्ट्रीय चित्रपट विकास म्हामंडळाचे 12 चित्ररथ ह्या चित्रपटां कडेन संबंदीत आसतले.

अंदूंच्या महोत्सवात 127 देशांतल्यान आयिल्ल्या प्रवेशिकां मदी 84 देशांचे 270 चित्रपट दाखयतले. तशेंच अंदूं इफ्फी ब्राझीलीयन ‘द ब्लू ट्रेल’ ह्या चित्रपटांतल्यान सुरवात करतले. तशेंच समारोप सुवाळ्यांत दिग्गज अभिनेते रजनीकांत हांकां जिणेगौरव पुरस्कारान भोवमानीत करतले. तशेंच आमिर खान 21 वर्सांनी इफ्फी सुवाळ्याक हाजीर आसतलो. 2004 वर्सा गोंयांत सुरू जाल्ल्या इफ्फीच्या उक्तावण सुवाळ्याक आमिर खान हाजीर आशिल्लो. ते उपरांत 2025 वर्सा तो इफ्फीक हाजीर आसतलो अशी म्हायती मेळ्ळ्या.

अंदूय पर्वरीतल्या आयनॉक्स, मडगांवां रवींद्र भवनांत प्रतिनिधींक चित्रपट पळोवपाची संद मेळटली. तशेंच मीरामार दर्यादेगेर स्क्रीन घालतले.