भांगरभूंय | प्रतिनिधी
केंद्रीय मंत्री एल. मुरुगन : 7500 प्रतिनिधी नोंदणी
भांगरभूंय । प्रतिनिधी
पणजी : गोंयांत 20 ते 28 नोव्हेंबर ह्या काळांत जावपी 56 व्या इफ्फी खातीर 127 देशांनी चित्रपट धाडिल्ले. महोत्सवांत हातूंतले 84 देशांचे 270 चित्रपट दाखयतले. इफ्फीच्या प्रतिनिधी नोंदणेक बरो प्रतिसाद मेळटा. आतां मेरेन 7500 प्रतिनिधींची नोंदणी जाल्या, अशी म्हायती केंद्री म्हायती आनी प्रसारण राज्य मंत्री एल. मुरुगन हांणी दिली.
शेनवारा पणजे जाल्ले पत्रकार परिशदेंत मंत्री मुरुगन उलयताले. ह्या वेळार मुख्यमंत्री डॉ. प्रमोद सावंत, खात्याची संचालक स्मिता शर्मा, एनएफडीसीचे वेवस्थापकीय संचालक प्रकाश मगदूम हाजीर आशिल्ले.
मंत्री मुरुगन हांणी सांगलें, इफ्फींत आमी दर वर्सा नव्यो गडाली हाडपाचो यत्न करतात. ह्या उद्देशान अंदूं उक्तावण सुवाळो मेकळ्या वाठारांत जातलो. उक्तावण सुवाळ्यांत 34 चित्ररथांची मिरवणूक पळोवपाक मेळटली. अंदूं इफ्फीची सुरवात ब्राझिलियन चित्रपट ‘दी ब्ल्यू ट्रेल’ चित्रपटान जातली. महोत्सवांत कंट्री फोकस विभागांत जपनांतले चित्रपट दाखयतले. तशेंच स्पेन आनी ऑस्ट्रेलिया देशांतल्या चित्रपटांचें विशेश प्रदर्शन जातलें. महोत्सवांतल्या विशेश विभागांत 50 महिला दिग्दर्शकांचे चित्रपट दाखयले.
भारतीय चित्रपट मळार 50 वर्सां योगदान दिल्ले खातीर समारोप सुवाळ्यांत कलाकार रजनीकांत आनी बाळकृष्णन हांचो विशेश सत्कार जातलो. अंदूंय 75 क्रिएटिव्ह मायंड ऑफ टुमारो विभागा वरवीं 124 तरणाट्या कलाकारांक संद दितले. अंदूं ए आय चित्रपटां खातीर लेगीत विशेश सर्त विभाग आसतलो. ते भायर फिल्म बाजार उपक्रम लेगीत चालीक लायतले. समारोप सुवाळ्यांत जिणेंगौरव तशेंच अंदूंच्या भारतीय चित्रपट कलाकार पुरस्कार जैतवंतांचो भोवमान करतले, अशी म्हायती मंत्री मुरुगन हांणी दिली. मुख्यमंत्री डॉ. प्रमोद सावंत हांणी सांगलें, इफ्फींत ‘क्लावडीया’ आनी ‘दी पायलट’ ह्या दोन गोंयच्या चित्रपटांची निवड जाल्या. विशेश गोंय विभागांत 17 चित्रपट आयल्यात. तातूंतल्या तीन चित्रपटांत पुरस्कार दितले. उक्तावण सुवाळ्याचे चित्ररथ मिरवणुकेंत 12 गोंयचे जाल्यार 11 चित्रपट मळा कडेन संबंदीत चित्ररथ आसतले. ते भायर आकाशदिवो सर्ती खातीर दरेका म्हालांतल्यान तीन जैतवंत वेंचतले.
‘आसेसांव’ खातीर आमचेय यत्न : मुख्यमंत्री
गोंयचे चित्रपट इफ्फींतल्या इंडियन पॅनोरमा विभागांत येवचे अशें आमकांय दिसता. कोंकणी भाशेचेर आमचोय मोग आसा. ‘आसेसांव’ चित्रपट इफ्फींत दाखोवचो हे खातीर आमच्या पांवड्यार यत्न चल्ल्यात. 28 नोव्हेंबराक प्रधानमंत्री गोंयांत येतात, तली लेगीत समारोप सुवाळो वेळार सुरू जातलो, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
