भांगरभूंय | प्रतिनिधी
अस्तुरेचेर जाल्ल्या अत्याचारांतल्यान आंतरराष्ट्रीय चित्रपट महोत्सव (इफ्फी) दिल्ली सावन गोंयांत आयलो. सिने संस्कृताय नाशिल्ल्या गोंयां सारक्या राज्यांत इफ्फी जाता म्हणून खेपप्यांक इफ्फीचें गोंयांतले अंदूचें 21 वें वर्स हें सांगपाची धिटाय सरकारान दाखयल्या. त्या भायर सानुल्या कोंकणी फिल्मांचें ल्हार इफ्फींत अंदूं आयलां. सिने संस्कृताय गोंयांत ना म्हण्टल्यांक ती जाप. कोंकणी ल्हान फिल्मांचो पावस पडूंक लागला, वाट दाखोवपी गोंया भायलेय आसात. धाकटुलीं फिल्मां भारताची सिने संस्कृताय जावंक शकता, नाच आनी गीतांची जोड दिवन. ओटीटी माचयेचीं नवीं ल्हारां केंद्र सरकार हाडटा ताका तेंको राज्यां दितलीं. राज्यांतल्या ल्हान चॅनलांक ल्हारांचो आदार मेळटलो? गोंयचे कोंकणी राजभाशेक, गांवगिरे संस्कृतायेक ओटीटी चॅनलाचेर मानाचो पाट मेळपाक जाय.
भारतीय फिल्मांक पश्चिमी संस्कृतायेची वाट आपणावची पडटली अशें इफ्फी संचालक शेखर कपूर हांणी सांगलां. पश्चिमी संस्कृताय भेस, भास आपणावन, न्ही एक ते देड वरांचे फिल्मांचे निर्मणेतल्यान दाखोवची पडटली. सानुलीं फिल्मां, सानुल्यो खबरो, सानुलीं दिसाळीं हो फुडार ग्रीन कॉरीडोराचो, इफ्फीचोय.
इफ्फींतल्या फिल्मांचो सानुलो कॅटलॉग फुडल्या वर्सा नासल्यारुय जाता. मोबायल अॅपाचेर आतां तिकेट आनी हेर म्हायती मेळटा. पेपरलेस इफ्फींत मोर (पिकॉक) कागदार कित्याक नाचोवप? मोबायल अॅपाचेर तो मेळटाच. इफ्फींतल्यान मोबायलावेल्या सिनेमाची भासाभास २००४ वर्सा सुरु जाल्ली. मोबायलार सिनेमा, खबरो मेळटात पूण त्यो अचूक आसात की न्हय हें सांगपाची जापसालकी खबर दितल्याक घेवची पडटली. भलायकी, खाण जेवणांच्या खबरांचो पावस गुगलावयल्यान पडटा. वाचपी कांय वेळार चार वळी वाचून वाचक भियेतात. वाचप्यान खबर निमणे वळी मेरेन वाचल्यार ताका कांय वेळार खबरेच्या निमाणे “डिसक्लेमर” (न्हयकारप) दिश्टी पडटलो. अर्थ एकूच दिल्ली खबर अचूक न्हय, दुबावीत, उखलिल्ली. अशा वेळार खबर दिवप्यान ती कोणें धाडली तें सांगप बरें.
सिनेमांत पयलींच तो खरो वा फट ? सिनेमा करपाक आदार कित्याचो घेतला तें सांगतात. निमाणे कडेन नांवांची वळेरी आसता. चडशे सिनेमा कल्पना, सपनांची मजत घेवन करतात. चडशा सिनेमांचें कथानक काल्पनीक आसता. हालीं तंत्रगिन्यान, संशोधनाची जोड दिवन तें खरें अशें दाखोवपाचे, सांगपाचे यत्न जातात. सिनेमांनी तंटा, झगडीं, मारामारी, जुलूम, आगळीक, व्यसनांचे चित्रण दाखयतना तें काल्पनीक आसा हें चीत्र फुडें येतना उतरांनी सांगप बरें. सेन्सॉर बोर्डाक तेविशीं निर्णय घेवचो पडटलो. मुखेल करून अस्तुरेचेर जावपी आगळीक, अत्याचाराच्या चित्रणाविशीं सेन्सॉर बोर्डान कांय मार्गदर्शक तत्वां घालून दिवंक जाय.
सिनेमाक शीम म्हेर नासता, विशय, इतिहास, संशोधनातल्यान फट तें सत अशें सांगपाचे, दाखोवपाचे यत्न जातात तेन्ना सेन्सॉर बोर्डान शिटूक रावप बरें. इफ्फी ल्हवू निर्मात्यांच्या हातांत वतलो, सिनेमोग्यां खातीरुच तो आसतलो हें श्री. कपूर हांच्या उलोवपांतल्यान कळटा. इफ्फीच्या वेगळ्या घरा खातीर मागणी उक्तावणा वेळार जावंक ना, उतरय मुख्यमंत्र्यांनी दिवंक ना. गोंयांत भूंय उणे आशिल्ल्यान व्हडल्या घरापरस कला अकादमीचे नवे, इफ्फी कचेरी आशिल्ल्या थळार सुवात दिवन इफ्फीक येवकार दिवपाचो विचार जावचो.
आयज सानुलीं फिल्मां तयार करपी चार पांच वर्सांनी दुसरे भासेंतल्यान, राश्ट्र वा राजभासेंतल्यान व्हड फिल्मां वाटेन वतलेच. तांचे खातीर अर्थिक, तंत्रिक आदार दिवपी येवजण चालू उरपाक जाय. कोंकणी फिल्मांचो उत्सव इफ्फीआदीं घेवन उत्कृश्टताय आशिल्लीं दोन चार फिल्मां इंडियन पॅनोरमा मेरेन पावोवपाक जाय.
आर्किटेक्टचर, सिव्हिल इंजिनियरिंगांत रिडेव्हेलॉपमेंटाचें तंत्र येता पूण तें शेंकड्यांनी वर्सां आदल्या बिल्डिंगेक उपेगी पडटलें? नामनेचे गोंयकार आर्किटेक्ट, सिव्हिल इंजिनियर भाव, भयणी देश, विदेशाक सेवा दितात, नव्या तंत्राचो अभ्यास करतात. तांचेकडेन सरकारान एकदां उलोवन इफ्फीथळ, आदिलशहा पॅलेसी विशीं निर्णय घेवचो पडटलो. दायज थळां म्हणून तांचेर सिनेमा करपाक येता.
मनरिजवणेचीं नवीं ल्हारां पर्यटन उद्येगाक लाव दिवपीं आसलीं तरी गोंयचे मातयेचें मूळ कलेचें, पर्यटनात नाशिल्लें हें सरकारान मानून घेवचें पडटलें. मनरिजवणेचीं नवीं कवाडां कलेचे उदरगती पासत उगतीं करपाक कलेंतल्या नव्या ल्हारांचो अभ्यास जावचो, शिक्षणांत तीं ल्हारां हाडचीं. कुशळटाय विकास खात्यांतल्यान स म्हयने ते स वर्सांमेरेनचे कलेचे अभ्यासक्रम हाडपाक जाय. इफ्फीच्या जाळवणदारांची मजत तेपासत घेवची. इफ्फींतल्यान कितलो लाव मेळ्ळो, कितलें लुकसाण कोणाक जालें हाचो नियाळ सरकारान करचो. इफ्फी पासत उबारिल्ल्या साधनसुविधां पासत केंद्र सरकारन अर्थिक आदार दिला. साधनसुविधा वर्सभर वापरपाक जाय, सानुल्यो मेकळ्यो माचयो, थिएटरां गांवांगांवांतल्यान आसचीं. नाटकांचो रुपकार सिनेमांनी करुंक येता? विद्यालय, म्हाविद्यालयांतले नाटक सर्तींतल्यान वर्षा उसगांवकार, आदित्य जांभळे, राजेश पेडणेकार हांचेवरी कलाकार घडले. इफ्फी गोंयांत येत सावन वर्साक एक पुराय लांबायेचो सिनेमा जातालो, अंदूं धा सानुलीं फिल्मां जाल्यांत. तींच इफ्फींतलीं नवीं ल्हारां. फिल्माचे भासेक म्हत्व येता, विशय, संवेदनशिलता वेळार समजावन दिवपी समीक्षक जाय. नवे वाटेर चुको जातना रोखडी माफी हो मंत्र नव्या ल्हारांचो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
