इफ्फींत चित्रपट, संस्कृती आनी कलेचें सादरीकरण

भांगरभूंय | प्रतिनिधी

२१ ते २८ नोव्हेंबर मेरेन इफ्फी उत्सव : अर्ली-बर्ड प्रतिनिधी नोंदणी सुरू

पणजी : भारतीय आंतरराष्ट्रीय चित्रपट महोत्सव (IFFI) २०२४ हांणी इफ्फीस्टा ह्या चित्रपट, जेवणाचे जिन्नस, कला आनी संवादात्मक सत्रांच्या जादू वरवीं सगळ्यांक एकठांय हाडपा खातीर तयार केल्ल्या मनरिजवणेच्या कार्यावळीचे सुरवातेची घोशणा केल्या. गोंयच्या पणजेच्या दर्यादेगेर आशिल्ले कला अकादेमींत इफ्फिस्टा आयोजीत करतले. २१ ते २८ नोव्हेंबरा मेरेन जावपी हो उत्सव सगळ्या पिरायेच्या लोकां खातीर एक उत्सव आनी मनरिजवणेचें सप्तक आसतलें. हे भव्य सांस्कृतीक कार्यावळींत जायतीं आकर्शणां आसतलीं. ह्या कार्यावळींतल्यान भोंवडेकारांक भारतीय संस्कृताय, जेवण, संगीत आनी चित्रपट हांच्या जिवंत विविधतायेचो अणभव घेवपाची संद मेळटली.

‘इफ्फिस्टा’त आसपाविल्ल्यो कार्यावळी

१) परंपरीक नाचाचें सादरीकरण: भारतांतलीं इकरा नृत्य मंडळां नृत्यविश्कार सादर करतले.
२) ‘खाद्ययात्रा’ ः हे खाद्ययात्रेंत १५ ते २० उत्कृश्ठ थळावे आनी राष्ट्रीय उपहारगृह आसतले. जे भारतांतल्या विवीध तरेच्या जेवणाचो आस्वाद घेवपाची संद दितले.
३) एनआयएफटी वरवीं फॅशन शो : नॅश्‍नल इन्स्टिट्यूट ऑफ फॅशन टेक्नॉलॉजी (छखऋढ) वरवीं आयोजीत फॅशन शो फाटल्या स दसकांतल्या भारतीय चित्रपटांचो सन्मान करतले.
४) चित्रपट मळावेल्या लोकप्रिय व्यक्तींचो उत्सव : हांगा ४,००० चौरस फुटांचें भव्य प्रदर्शन राज कपूर, मुहंमद रफी, अक्किनेनी नागेश्वर राव आनी तपन सिन्हा हांचे सयत चित्रपट मळावेल्या दिग्गजांचें दायज मनयतले.
५) ‘नॅशनल फिल्म आर्कायव्ह ऑफ इंडिया’ कलाकृती : ही कलाकृती, चित्रपट पुनरुज्जीवीत करपाची कला आनी अभिजात चित्रपट जपपाक गुंथिल्ल्या कश्टी, मात खोस दिवपी कामाचो प्रवास सांगतलीं.
६) भारतीय चित्रपटांच्या राष्ट्रीय संग्रहालयाची भोंवडी: हे भोंवडेंत दृकश्राव्या वरवीं चित्रपटांचो इतिहास आनी आधुनीक सिनेमॅटीक कथाकथन हांचें मिश्रण अभ्यागतां मुखार सादर करतले.
७) प्रसार भारती ओटीटी अणभव केंद्र : प्रसार भारती ओटीटी केंद्र महोत्सवांत वचप्यांक ओटीटी (ओव्हर-द-टॉप) आशयांतली म्हायती जाणून घेवपाची, डिजिटल चित्रपट आनी टेलिव्हिजनांतल्यो नव्यो गजाली जाणून घेवपाची संद मेळटली.
८) वेव्हज- क्रिएट इन इंडिया संवाद दालन : ह्या दालनांत संवाद सादपाची संद दितले. तशेंच सर्जनशील आव्हानांत वांटेकार जावपाची आनी संवसारीक मनरिजवणेच्या मळार भारताच्या वाडपी प्रभावा विशीं जाणून घेवपाची संद दितले.
९) इन्फ्लेटेबल थिएटरांत चित्रपटांचें प्रदर्शन : १४० सिटांची तांक आशिल्ल्या इन्फ्लेटेबल थिएटरांत भारतीय पॅनोरमा आनी विवीध ओटीटी माचयेवेले चित्रपट दाखयतले.
१०) फॅन्सांचो चित्रपट स्टारां कडेन संवाद : झोमॅटो डिस्ट्रिक्ट एंटरटेनमेंट एरिना ही संस्था चित्रपट उद्येगांतल्या मुखेल व्यक्तीं वांगडा संवाद सादपाची एक खासा कार्यावळ आयोजीत करतले. तशेंच प्रस्नोत्तर सत्रां, सय घेवपाची आनी सोशल मीडिया संवादां वरवीं उत्कृश्ट कलाकारां कडेन संवाद सादपाची संद मेळटली.
११) संगीत, डीजे आनी स्टँड-अप कॉमेडी : झोमॅटो कडेन भागीदारी सयत मनरिजवण क्षेत्र सदांच संगीत, डीजे परफॉर्मन्स आनी स्टँड-अप कॉमेडी शो सयत लायव्ह परफॉर्मन्सचें आयोजन करतले.

नांव नोंद करून प्रतिनिधी जायात
इफ्फीच्या पुराय प्रवासाचो अणभव घेवपा खातीर, अर्ली-बर्ड प्रतिनिधी नोंदणी १,००० रुपया + कर ह्या विशेश मोलांत सुरू आसा. ती आयज १० नोव्हेंबर उक्ती आसतली. हे तारखे उपरांत, नोंदणी शुल्क २,००० रुपये (करा सयत) आसतली. ही नोंदणी इफ्फिस्टा च्या सप्तकभर चलपी उत्सवा वांगडाच सगळ्या कार्यावळींनी प्रवेश उपलब्ध करून दिता.