भांगरभूंय | प्रतिनिधी
पणजी : अंदूं इफ्फीक आंतरराष्ट्रीय पुरस्कार फावो जाल्लो कोंकणी चित्रपट ‘आंसेंसांव’ प्रदर्शीत करचो. सिनेमाटोग्राफर के. वैकुंठ हांचे शताब्दीनिमतान विशेश कार्यावळ करप, तशेंच गोवा चित्रपट अनुदान येवजणेचो निधी इफ्फी पयलीं गोंयच्या निर्मात्यांक दिवचो अशी मागणी चित्रपट कलाकारांनी केली. मंगळारा पणजी जाल्ले पत्रकार परिशदेंत लक्ष्मीकांत शेटगांवकार, साईश पाणंदीकार आनी विशाल पै काकोडे हांणी ह्यो मागण्यो केल्यो.
ह्या वेळार दिग्दर्शक लक्ष्मीकांत शेटगांवकार हांणी राज्य सरकार आनी गोंय मनोरंजन संस्था (ईएसजी) हांचेर ‘गोवा फिल्म फायनान्स स्कीम’ खाला निधीचें वांटप करूंक नाशिल्ले विशीं टिका केली. तांणी म्हणलें, सरकार दरेका इफ्फी पयलीं व्हडलीं व्हडलीं आस्वासनां दिता. मात प्रत्यक्षांत निधी वाटपाक कळाव जाता. हाका लागून खुबशे गोंयचे चित्रपट अर्दवट अवस्थेंतूच उरतात. फाटलीं णव वर्सां हो निधी मेळूंक ना. हाका लागून थळावे चित्रपट निर्माते उबगल्यात.
साईश पै पाणंदीकार हांणी, एनएफडीसीची निवड प्रक्रिया अन्याय करपा सारकी आशिल्ल्याचो आरोप केलो. तांणी म्हणलें, क्लावडिया सारकिल्लो चित्रपट जो खंयच प्रदर्शीत जावंक ना आनी भारतीय पॅनोरामा विभागांत निवडूंक ना, तो ‘स्पेशल प्रेझेंटेशन’ म्हणून दाखयतले. जाल्यार आंतरराष्ट्रीय पांवड्यार दोन पुरस्कार फावो जाल्लो कोंकणी चित्रपट ‘आसेंसांव’ कडेन मात आडनदर केल्या.
विशाल पै काकोडे हांणी, इफ्फीचो ब्रॅण्ड व्हॅल्यू आतां देंवला. दर वर्सां आंतरराष्ट्रीय प्रतिनिधींची हाजेरी आनी प्रायोजकांची संख्या देंवत आसा. आमचेच गोमंतकीय चित्रपट आनी चित्रपट कलाकार हांचो भोवमान करिनाशिल्लें राज्य संवसाराक कितें दाखयतले? असो प्रस्न हाजीर जाला. इफ्फीकडेन फकत एक इव्हेंट म्हणून पळयनासतना थळाव्या चित्रपट कलाकारांक संधी दिवपाचें एक माध्यम म्हणून पळोवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
