भांगरभूंय | प्रतिनिधी
नवी दिल्ली, खबरां संस्था: १६ वर्सां सकयल्या भुरग्यांक आतां पालकांच्या परवानगी बगर इंस्टाग्रामाचेर लायव्हस्ट्रीम करपाक मेळचें ना. तशेंच पालकांच्या परवानगी बगर नग्नताये संबंदीत कितेंच पळोवंक वा धाडूंक मेळचें ना.
फेसबूक, इंस्टाग्राम कंपनी मेटा हांणी १६ वर्सां सकयल्या वापरप्यांची सुरक्षीतताय आनीक घटमूट करपा खातीर हे बदल केल्यात. सध्या अमेरिकेंत, ब्रिटनांत, कॅनडा आनी ऑस्ट्रेलियांत हे बदल चालीक लायल्यात आनी कांय म्हयन्यांनी संवसारभर सुरू जातले.
फेसबूक आनी इंस्टाग्रामाचेर १६ वर्सां सकयल्या वापरप्यांक फटोवप आनी लैंगीक अत्याचार करपाच्या प्रकरणांत बरीच वाड जाल्या. हाचे उपरांत ह्या वापरप्यांची गुप्तताय आनी सुरक्षीतताय सांबाळपा खातीर सप्टेंबरांत तांच्या खात्या खातीर खाशेली सुविधा सुरू केल्ली. हे सुविधाये वरवीं पालकांक आपल्या भुरग्यांच्या ऑनलायन वापराचेर चड नियंत्रण दवरपाक मेळटा. हातूंत भर म्हणून आतां ह्या वापरप्यांक ‘लायव्ह स्ट्रीमिंग’ करपाकय बंदी घालतले. चड करून १६ वर्सां सकयलीं नेण्टीं भुरगीं जायते फावट ऑनलायन चॅटींग करून लैंगीक त्रासांक बळी पडटात. हातूंत ‘लायव्ह व्हिडियो’चो व्हड प्रमाणांत गैरवापर जाता. ह्या बदला प्रमाण १६ वर्सां सकयल्या नेण्ट्या वापरप्यांक इंस्टाग्रामाचेर ‘लायव्ह’ वचपाक पालकांची परवानगी जाय पडटली. तशेंच इंस्टाग्राम खात्यांतल्यान धाडिल्लीं आक्षेपार्ह इमेज पळोवपाचो पर्याय तांकां मेळचो ना अशें मेटान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
