भांगरभूंय | प्रतिनिधी
सर्व्हेचेर दाखयिल्लीं घरां कायदेशीर आशिल्ल्याचें दितले प्रमाणपत्र
भांगरभूंय । प्रतिनिधी
पणजी : संजिवनी साकर कारखान्यांत इथेनॉल निर्मिती प्रकल्पाची निविदा म्हयन्याभरांत जारी जातली. इथेनॉल प्रकल्पा खातीर गोंयांतल्या शेतकारांचो ऊस खरेदी करतले, अशें मुख्यमंत्री डॉ. प्रमोद सावंत हांणी सांगलें. सर्व्हे आराखड्याचेर उल्लेख आशिल्लीं घरां कायदेशीर आशिल्ल्याचें प्रमाणपत्र महसूल खात्या सयत पंचायतीन वतीन दिवपाची तजवीज कायद्यांत करतले, अशेंय आस्वासन तांणी दिलें.
पावसाळी अधिवेशनांत अर्थसंकल्पा वयले चर्चेचो समारोप मुख्यमंत्री डॉ. प्रमोद सावंत हांच्या भाशणान जालो. चर्चेक जाप दितना मुख्यमंत्र्यान वयलें आस्वासन दिलें.
खूब आदीं सावन आशिल्ल्या घरांक संरक्षम दिवचे खातीर सरकार ह्या अधिवेशनांत विधेयक हाडटलें. 1972 सावन जीं घरां सर्व्हे नकाशाचेर दाखयल्यात, ती कायदेशीर आसात, अशें प्रमाणपत्र महसूल खात्या सयत पंचायती वतीन दितले. हाका लागून हीं घरां कोणाकूच फुडारांत मोडपाक मेळचीं नात.
अर्थीक वेवस्थापनाक लागून गोंयची अर्थीक स्थिती आतां घटमूट जाता. 4500 कोटींचें रीण घेवपाची मर्यादा आसून लेगीत फाटल्या अर्थीक वर्सांत 1050 कोटी इतलेंच रीण घेतलां. अर्थसंकल्प हो चिप्साच्या पाकिटा सारको ना, तो चवथीचे माटोळे भशेन आसा. अदमासपत्रकी तूट 2018-19 त जीएसडीपीच्या 2.5 टक्के आशिल्ली ती 2022-23 1.2 टक्क्याचेर आयली. अटलसेती खातीर घेतिल्लें 117 कोटी रुपयांचें रीण सरकारान मुजती आदीं फारीक केलां. तशेंच डेटा एनेलेटीक विभागाक लागून विवीध खात्यां कडल्यान 48 कोटींची बचत जाल्या.
कर्मचारी भरती आयोगाक लागून विवीध खात्यांतल्या कर्मचाऱ्यांची भरती पारदर्शक जाल्या. बिहारांत केंद्रीय लोकसेवा आयोगाचे परिक्षेची तयारी आदीं सावन करतात. हाका लागून बिहारांतल्यान सगल्यांत चड विद्यार्थी आयएएसची परिक्षा पास जातात. गोंयांतल्या विद्यार्थ्यांनी स्पर्धा परिक्षांची तयारी बेगीन सुरू केली जाल्यार गोंय लोकसेवा आयोगूच न्हय जाल्यार केंद्रीय लोकसेवा आयोगाची परिक्षा लेगीत ते पास जातले. सरकारान राष्ट्रीय शिक्षण धोरणाची येसस्वी तरेन कार्यवाही सुरू केल्या. वर्सभरांत सगल्या शाळांची दुरुस्ती पुराय जातली. सरकारी शाळा, विद्यालयांतले बाक आनी बोर्ड लेगीत बदलतले. सरकारी म्हाविद्यालयांनी प्लेसमेंटा खातीर कॅम्पस इंटरव्ह्यू घेवपाची प्रक्रिया सुरू जाल्या. कॅम्पस इंटरव्ह्यूंत 50 टक्के विद्यार्थ्यांक नोकरी मेळूं येता.
हाचे मुखार सिवरेज टँकराचे नोंदणी सयत एसटीपी प्रकल्पाक जोडणी दिवपाची जापसालदारकी सिवरेज म्हामंडळा कडेन आसतली. सिवरेज जोडणी तशेंच हेर खंयचीच कामां भौशीक बांदकाम खात्याक करची पडचीं नात.
रस्त्यांच्या पेड्डेर कामां खातीर सरकारान कंत्राटदारांक नोटिसो दिवपा सयत एकाचो परवानो निलंबीत लेगीत केला. डिफेक्ट लायबिलीटी काळा खाला रस्त्यांची दुरुस्ती फुकट करून दिवप कंत्राटदारांक बंधनकारक आसा. गोंयांत भुंयगत वीज कॅबल घालपाचीं कामां व्हड प्रमाणांत चालू आसात. लायनमॅनांक खांब्यार चडचे खातीर बॉक्स लिफ्टीची वेवस्था करतले.
बस धनयांक अनुदानाचे उरिल्ले पयशे दिवपा वांगडाच म्हजी बस येवजणेचोय लाव मेळटलो. म्हजी बस येवजणेक लागून बस धनयांक म्हयन्याक अतिरिक्त 20 हजार रुपया मेळटले.
आतां मेरेन 12 खण ब्लॉकांची पावणी जाल्या. 9 लिजां सुरू जाल्यांत. डंप म्हालाची पावणी करपा वांगडाच आनीक 4 खण ब्लॉकांची पावणी जातली. हाका लागून खण वेवसाय व्हड प्रमाणार सुरू जातलो. पंचायतींक योग्य तरेन आनी वेळार निधी मेळचो हे खातीर जीआय निधी दिवपाचे पद्दतींत बदल करतले. 1 ऑगस्ट सावन सगल्या पंचायतींनी एआयचेर आदारीत हाजेरी नोंदणी पद्दत सुरू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
